Departamenti i Kërkimeve në Bankën e Shqipërisë publikoi një studim të ri përsa i përket rritjes së konkurrencës në tregun bankar. Gjithashtu ndikon edhe në forcimin e stabilitetit të sistemit.
Përfundimet e këtij studimi na bëjnë me dije se politikat që shtyjnë bankat drejt një konkurrence më të madhe nuk dëmtojnë aftësinë paguese të bankave. Rrjedhimisht, forcimi i konkurrencës forcon shëndetin dhe stabilitetin e sektorit bankar.
Ndër të tjera, një nga objektivat e këtij studimi ishte ballafaqimi me teorinë se, pasi arrihet një prag i caktuar, një rritje e mëtejshme e konkurrencës priret të nxisë stimujt e ndërmarrjes së rrezikut të tepërt dhe mundësinë e dështimit të bankës.
Sipas studimit, zhvillimet e lidhura me rritjen e konkurrencës janë relativisht vendimtare për rritjen e stabilitetit bankar, në veçanti në periudha krize, pasi edhe efekti i tyre mbështetës është gjetur se është i rëndësishëm. Ky ndikim pozitiv është konstatuar si për bankat e vogla, ashtu edhe për ato të mëdha.
Kriza e nisur pas vitit 2008, solli një ndikim të ndjeshëm në strukturën e sektorit bankar në shumicën e vendeve të Europës. Me qëllim krijimin e bankave më të forta, autoritetet rregullatore nxitën një proces konsolidimi përmes shitblerjeve dhe bashkimeve mes bankave të ndryshme.
Pjesë e këtij procesi ishte edhe trysnia e ushtruar ndaj grupeve të mëdha bankare që patën probleme për të dalë nga tregjet periferike dhe për të forcuar aktivitetin në tregjet e tyre tradicionale. Ky proces përfshiu edhe Shqipërinë. Numri i bankave tregtare është ulur në 12, nga 16 që ishin tre vjet më parë.
Efekti i këtij procesi në konkurrencën brenda tregut ngelet për t’u parë gjatë viteve në vazhdim. Megjithatë, në rrafshin teorik, krijimi i bankave më të mëdha dhe më të shëndetshme mendohet ta ndikojë pozitivisht konkurrencën në tregun bankar.
VAZHDO TË LEXOSH MË TEPËR PËR TEMËN
“Banka do marrë goditje nga tërmeti”
‘Rigjallërim’ kreditimit/ Ulje të kredive me probleme
