Partizani e nis vitin me prezantimin e trajnerit të ri, një njohje e klubit të kuqit. Adolfo Sormani është trajneri i ri i Partizanit. 54-vjeçari i lindur në Napoli rikthehet në krye të “demave të kuq”, post të cilin e ka mbajtur edhe në vitin 2016.
Përmes njoftimit përkatës në faqen e internetit, klubi kampion në fuqi i Shqipërisë bën me dije detajet e kësaj “martese” dimri:
“Klubi i Futbollit Partizani njofton arritjen e marrëveshjes me Adolfo Sormanin. Trajneri 54-vjeçar ka qenë pjesë e klubeve të Juventusit e Napolit në Itali dhe së fundi në krye të ekipit danez, Velje, me të cilin arriti rezultate shumë pozitive.
Nën drejtimin e Sormanit, i cili kthehet në familjen e kuqe, përgjatë sezonit 2016-2017 ekipi ynë arriti rezultate historike në kompeticionet europiane, duke u kualifikuar deri në fazën “play off” të “Europa League”.
Trajneri Sormani ka nënshkruar një kontratë për 2 vite e gjysmë, është prezantuar sot nga presidenti Demi, dhe menjëherë i është bashkuar ekipit në seancën stërvitore në kompleksin sportiv “International Tirana” në Pezë”.
Misioni i Sormanit është rikthimi në krye, sepse mbrojtja e titullit konsiderohet diçka parësore. Kuptohet, nuk do të jetë e lehtë, sepse rivaliteti në këtë sezon duket më i madh; me Kukësin, Tiranën, Teutën e deri diku Bylis.