Kualifikimi historik i Atalantës në çerekfinale të Champions League solli edhe një rekord për Kombëtaren shqiptare. Për herë të parë një futbollist që është pjesë e kombëtares kuqezi do të luajë në këtë fazë. Fjala është për mbrojtësin Berat Gjimshiti.
Këtë fat mund ta ketë edhe Elseid Hysaj me Napolin, por do të jetë e vështirë, pasi do të përballet me Barcelonën në Camp Nou. Pasi kishte fituar ndeshjen e parë ndaj Valencias me rezultatin e thellë 4-1, Atalanta kishte detyrën të ruante atë rezultat të marrë në “San Siro” dhe ia arriti qëllimit me Iliçiç, i cili arriti të shënojë katër gola dhe të dërgojë skuadrën e tij për herë të parë në çerekfinale të Champions League.
Por jo vetëm Iliçiç ka merita për këtë sukses historik. Edhe Berat Gjimshiti me shokë bënë maksimumin e tyre për të gëzuar gjithë bergamaskët, të mbyllur nëpër shtëpia për shkak të përhapjes së koronavirus. Por le të djekim pak ecurinë e Gjimshitit në futbollin Italian…
Sampdoria, Bologna, Torino, Napoli, Roma, Crotone, Inter, Verona, Fiorentina, Cagliari, Lazio, Juventus, Sassuolo dhe Atalanta. 14 ndeshje, 14 humbje. Para barazimit kundër Milanit, me golin e Brignoli. Nga këto 14 humbje të ecurisë jashtëzakonisht negative të Benevento, në pjesën e parë të sezonit 2017-2018, Berat Gjimshiti përjetoi 6 prej tyre në formacion.
Tashmë, pak më shumë se dy vite më vonë, Gjimshiti është titullar i një skuadre që ëndërron gjysmëfinalen e Champion League. Shqiptari është titullar i një skuadre si Atalanta, e aftë të befasojë tërë Europën. Herë në të djathtë dhe herë në qendër të mbrojtjes me tre të bergamaskëve është ai, shqiptari me pasaportë zvicerane.
Mbrojtësi ynë kuqezi e kishte bërë të qartë sezonin e kaluar se ishte një mbrojtës jashtëzakonisht i besueshëm. Me qetësi, pa pretenduar emrin e madh, ai kishte luajtur 24 ndeshje në kampionat, qoftë si titullar, qoftë si zëvendësues. Jo pak. Sapo ishte kthyer nga huazimi i tij te Benevento.
Një vit pozitiv për të, për herë të parë i aktivizuar vazhdimisht në Serie A. Pas ecejakeve në Serie B, gjithçka ka ndryshuar për shqiptarin, që e sheh veten në çereknale të Ligës së Kampioneve. Këto ditë, futbolli italian është ndalur nga “Coronavirus”, por ngritja e Beratit vazhdon. Dhe tani ëndrra e tij ka një emër të qartë dhe të saktë: Champions!
VAZHDO TË LEXOSH MË TEPËR PËR TEMËN
“Ashensori” Gjimshiti, shqiptari që kaloi limitet
