Një vajzë i jep një shuplakë moralë të mëdhenjve të Evropës dhe Amerikës:
Letra që u bë virale e që përfshin mendimin
shumë italianëve. Në pak orë ajo ka bërë xhiron e botës “Letra e Marina Stella Di Somma’” e ka shkruar me një frymë – por mbi elementë të arsyetuar – në adresë të Presidentit Francez Emmanuel Macron dhe Kancelares gjermane Angela Merkel, Presidentit të Shteteve të Bashkuara Donald Trump e kryeministri britanik Boris Johnson. Në letrën, të cilën drejtuesit e Francës, Gjermanisë, Anglisë dhe Shteteve të Bashkuara
s’do ta lexojnë kurrë (për fat të keq, pse… nuk dihet nëse ndokush mund t’ua dorëzojë një
kopje) ekziston mendimi i shumicës dërrmuese së italianëve, prej atyre të cilët janë të lodhur duke u përplasur në fytyrë atyre që na
shfrytëzojnë dhe më pas na denigrojnë. Kjo s’është çështje politike, por krenari
kombëtare… dhe jo vetëm kaq.
*Nga Marina Stella di Somma
Faleminderit të dashur zoti Macron, e dashur zonja Merkel!
Faleminderit që na braktisët në momentin që patëm nevojë. Faleminderit që s’na lejuat të merrnim nga ju maska të thjeshta dhe të tjera paisje që na duheshin për të parandaluar përhapjen e virusit. Do t’ju kishim paguar, e dini?
Jemi italianë, ata njerëzit e pistë, të padisiplinuar, qesharakët, folkloristët, të varfërit, ndonjëherë dhe kriminelët. Po jemi dhe ata që ju ndërtuan rrugët, shkollat, që ju kemi mësuar alfabetin që përdorni, ata që ju shpjeguan ligjet, krijimin e shtetit dhe mbrojtjen e të drejtave. Jemi ne italianët, autorët e veprave që qëndrojnë muzeve tuaja, të teksteve që studioni dhe shpikjeve që përdorni.
Ata që me sakrificë të madhe ruajnë 70% të pasurisë artistike të botës dhe i paguani një shifër të papërfillshme për vizitat në muze, ndonjëherë as atë jo. Jemi ne, italianët, ata që ju ofruan artin, kulturën, aty ku bazohet qytetërimi ynë dhe i juaji, shpjegimi më i mirë që njeriu i ka bërë së bukurës, harmonisë e ekuilibrit.
Jemi ne, italianët, që ju dhuruam qytetërimin, atë që ju e hodhët poshtë dhe e çuat drejt Mesjetës dhe ne sërish, të rilindur, i dhuruam botës një tjetër qytetërim, artin, gjeografinë, ekonominë, arsimin.
Jemi ne, italianët, ata që krijuan mozarellën, parmixhanon, proshutën, raviolin, tortelinit, lazanjën, akulloren, picën, etj etj. Ata që çuan në Francë verën dhe u mësuam se si ta bënin, ata që çdo vit luftojmë me produktet tuaja që tentojnë të na kopjojnë edhe emrat, por edhe stilin e modën.
Edhe ju zoti Trump e zoti Johnson, faleminderit që pikë së pari që u izoluat prej nesh, në vend që të na ndihmonit. Ju rikujtoj zoti Trump, se po të mos ishte për një italian, do ishit në tokën e parardhësve tuaj ku do të vuanit nga uria dhe jo në Amerikë, ku jeni i pasur. Nuk do mund të haje as patate, sepse nuk do t’i kishit, nëse një italian s’do kishte udhëtuar drejt tokës tuaj.
Juve zoti Johnson, ju kujtoj se fati i popullit tuaj bazohet në një flamur, që ua dhamë ta vinit në anijet tuaja, që të mos sulmoheshit nga piratët. Kryqi i San Giorgos, i dhuruar nga Republika e Genovas, pa të cilin do ishit zhdukur nga harta. Ju mësuam të përdorni hartat dhe ju i përdorët mjaft mirë. Të gjithë ju, kur telefononi, mendoni për Meuccin, kur shihni televizor dhe dëgjoni radion mendoni për Marconin. Kur përdorni energjinë elektrike, si të mos kishte të nesërme, mendoni se s’do mund ta bënit po të mos ishte Fermi.
Ne italianët kemi shpikur bankat, universitetet, arkitekturën, inxhinerinë, astrofizikën, kalendarin, muzikën. Ishin italianë si Kolombi, Marco Polo, Leonardo Da Vinci, Michelangelo, Bernini, Tiziano, Raffaello, Brunelleschi, Galileo, Çezari, Oktaviani, Aurelio, Dante e mund të vazhdoja me orë.
Të dashurit e mi, kur dëgjoni emrin Itali duhet të çoheni në këmbë, të ulni kokën dhe të jeni të vetëdijshëm që origjina e shoqërisë perëndimore është këtu.
Nëse ju kërkojmë ndihmë, duhet të vraponi, sepse nëse e çoni botën në një Mesjetë tjetër, s’e di nëse do ia dalim që të krijojmë një tjetër qytetërim. Nëse nuk ju intereson, atëherë kënaquni me ato çka keni, vazhdoni të admironi ato mijëra ton hekur dhe kur shkoni në muze, ju lutem, mos i shihni veprat e italianëve, e do ta mbaroni vizitën tuaj shumë shpejt. Mund të shkoni të vizitoni një fabrikë të bukur makinash, nga ato që nuk krijojnë ndotje. Shkoni të vizitoni ato që për ju janë kështjella e për ne vetëm vila, me të cilat jemi të mbushur plot. Ose shkoni në kryeqytetet që janë kopje e Venezias, Firenzes, Romës, shkoni!
Evitojeni vizitën në vendin më të bukur të botës, duke qenë se e braktisët me shpatulla pas murit. Ne do të mirëpresim vetëm ata që në momentin kur patëm nevojë, na ndihmuan. Do i hapim qytetet tona, unike në botë, për ta. Do mund të vizitojnë Venecian, Romën, Firenzen, Genovën, Napolin, Bolonjën, Pisën, Sienën, Torinon, Palermon, Milanon, Cremonën, Mantovën, Ferrarën, Toscanën, Puglien, Siçilinë, Sardenjën. Shkatërruat Greqinë e shkretë me financat tuaja. E provuat dhe me Italinë, por për momentin nuk ja keni dalë ende.
Tani ndoshta patët momentin për t’i dhënë goditjen e fundit, por me egoizmin tuaj nuk keni llogaritur faktin që virusi nuk ka kufij, do ju godasë të gjithëve, edhe ju. Nëse do na ndihmonit dje në tentativën për të parandaluar epideminë, në vend që të na ofendonit dhe të na përbuznit, sot ndoshta nuk do ju duhej të qanit të vdekurit tuaj. Egoizmi juaj i ka treguar të gjithëve sa të vegjël jeni.
Faleminderit… nga një vajzë italiane!
Marrë dhe përkthyer nga Il corriere della Citta
