Sa njerëz vdesin pasi infektohen me koronavirus? Sipas një studimi të publikuar të hënën, më pak se ç’mendonim, por më shumë se nga gripi.
Studimi i publikuar në revistën shkencore The Lancet Infectious Diseases, zbuloi se rreth 0.66% e të infektuarve vdesin.
Vdekshmëria e koronavirusit, që është më e vogël se përllogaritjet e mëparshme, merr parasysh edhe rastet potenciale që nuk diagnostikohen – por sidoqoftë, është më e madhe se 0.1% e njerëzve që vdesin nga gripi.
Kur nuk përfshihen infeksionet e paidentifikuara, studimi i Lancet doli në përfundimin se norma e vdekshmërisë është 1.38%, që përkon me shifrat e publikuara më parë.
Në fillim të marsit, Dr. Anthony Fauci, kreu i US National Institute of Allergy and Infectious Diseases, tha se “kjo është punë llogarish dhe nëse e llogarit, i bie 2%.”
Por ai theksoi se numri mund të zvogëlohej sepse varet pjesërisht nga rastet e pallogaritura asimptomatike.
Në studimin e ri, shkencëtarët u përpoqën të gjenin normën e vdekshmërisë reale të infeksionit. Në fjalë të tjera, nga gjithë të infektuarit – jo vetëm nga ata që u sëmurën rëndë dhe u testuan – sa njerëz do të vdesin?
Shkencëtarët kombinuan të dhënat e “prevalencës së infeksionit” me informacionin publik të të infektuarve dhe të vdekurve dhe përllogaritën një normë vdekshmërie rreth dy të tretat e 1%.
Përqindja u rrit te moshat e mëdha, rreth 7.8% e të prekurve mbi 80 vjeç do të vdesin.
Për grupmoshat nën 40 vjeç, norma e vdekshmërisë s’e kalonte kurrë 0.16%. Nga 1000 të rinj të infektuar, një ose dy humbasin jetën.
Gjithashtu, studimi zbuloi se të sëmurëve u duhen disa javë për t’u shëruar. Mesatarisht, nga shfaqja e simptomave deri në daljen nga spitali, një pacienti i duhen 25 ditë. Ndërsa ata që s’i mbijetuan dot virusit, vdiqën rreth 18 ditë pas simptomave të para./ CNN
