Presidenti i Republikës, Ilir Meta, njofton se ka dekretuar ndryshimet në Kodin Penal, duke i vlerësuar ato si të nevojshme në këtë kohë të fatkeqësisë natyrore.
Në një komunikim live nga “Facebook”, Kreu i Shtetit deklaroi se mbështet nismën e qeverisë për ndryshime në Kodin Penal, që parashikon dënime me burg për të gjithë ata që kryejnë me dashje veprime duke përhapur koronavirusin.
I pyetur se si po e menaxhon qeveria këtë situatë dhe e mendon se po e përdor për më shumë pushtet, Presidenti Ilir Meta tha se “Shqetësimi i im dhe i juaji është shëndeti i cdo qytetari dhe i ekonomisë sonë, nuk besoj se është koha për të përdorur apo keqpërdorur cilido për qëllime pushteti një krizë të tillë, pasi do të ishte e papërgjegjshme dhe me kosto që do të përpiqej që ta bënte” tha ai.
“Lidhur me konventën kjo është një praktikë që njihet edhe nga vetë Këshilli i Europës në raste të caktuara ku për një arsye madhore një vend anëtar ndërmerr kufizime të imponuara, por sigurisht që besoj se Këshilli i Europës dhe Komisioni i Venecias e kanë bërë të qartë se nuk duhet abuzuar me situata të tilla për të dëmtuar parimet Kushtetuese, cenuar të drejtat dhe e cmoj rritjen e transparencës dhe bashkëpunimit. Sa më shumë transparencë, më shumë konsensus dhe mirëkuptim” tha ai.
“Sa i takon lajmeve shqetësuese nga Kruja apo Kurbini është me mjaft rëndësi që të respektohen distancat sociale dhe të ketë standarde të detyrueshme nga institucionet e shëndetit publik për cdo aktiviteti, cdo nënvlerësim do të ishte me kosto të jashtëzakonshme, do të ishte kosto e shtuar financiare, ekonomike dhe psikokologjike. Duhet parandalimi i krijimit të vatrave të reja. Nëse nuk garantohet standardet për mbrojtjen e kushteve të shëndetit aktivitete të tilla nuk duhet të lejohen dhe punonjësit duhet të mbështeten nga qeveria” tha ai.
Meta ka dekretuar ndryshimet në Kodin Penal sa i përket dhunës në familje, edhe pse është shprehur se ka disa rezerva.
“Duhet t’i nënshtrohen një fushate të gjerë informimi publik. Duhet të rrisin kapacitete e tyre për t’u përgjigjur kërkesave në nevojë, rritje numrit të testimeve duhet të jetë qëllim i qeverisë. Edhe ndryshimet e tjera që trajton dhunën në familje, shihet me rezervë subjektet e shtuara në dispozitë. Të rritet transparenca dhe rritjen e shtresës në nevojë”, tha Meta.
Ai nuk ka zgjedhur që të bëjë komente lidhur me akuzat e opozitës se qeveria ka blere teste me çmim shumë herë më të lartë se tregu. Ai shtoi se në një situatë të tillë pandemie, thelbi është transparenca.
“Lidhur me shqetësime te opozitës, këto kufizime që imponohen për shkak të një pandemie duhet të shërbejmë për të rritur përgjegjshmërinë e menaxhimit të krizës dhe mënyra më e mirë është rritja e transparencës, aq më tepër kemi të bëjmë me një vëmendje të shtuar të të gjithë qytetarëve, unë mund të apelojë për të rritur transperencën në këtë drejtim”, tha Meta.
“Kemi pasur disa vështirësi në këtë drejtim për kthimin e shqiptarëve, qeveria ka marrë disa masa, por besoj se duhet të marrë më shumë për garantuar kushte sa më shumë për karantinimin e tyre në të gjitha mjediset, në varësi edhe të rrethanave gjeografike dhe fizike nga vijnë. Duhet bërë edhe më shumë dhe shpresojmë që të merren masa më të plotë. Nuk mund të them se ku duhet të vendosen, por kushtet që unë i kam verifikuar në kovaleshencën e ministrisë së mbrojtjes janë optimale, por se kush do të trajtohet atje, i takon autoriteteve” tha ai.
Deklarata e plotë e Presidentit
Si Presidenti i Republikës, në mbështetje të nenit 84 dhe 93 të Kushtetutës, kam dekretuar shpalljen e ligjit nr. 35/2020 “Për disa shtesa dhe ndryshime në ligjin nr. 7895, datë 27.1.1995, ‘Kodi Penal i Republikës së Shqipërisë’, të ndryshuar”, të miratuar nga Kuvendi i Shqipërisë.
Shpallja e ligjit u vlerësua e nevojshme në situatën pandemike që po kalon vendi ynë, për arsye se kohëzgjatja, pasojat, apo mundësia e ripërsëritjes së një situate të tillë, mbeten ende të paparashikueshme.
Kam ndjekur nga afër shqetësimet e bëra publike nga aktorë të ndryshëm mbi propozimin dhe miratimin e ndryshimeve në Kodin Penal.
Shmangia e procedurave të përshpejtuara në miratimin e ligjeve që kërkojnë shumicë të cilësuar, nuk është një kërkesë vetëm formale kushtetuese, që duhet të respektohet nga komisionet e përhershme parlamentare dhe seanca plenare.
Përkundrazi, është një kërkesë kushtetuese që në thelb kërkon kryerjen e ndryshimeve në ligje të rëndësishme, me një konsultim dhe konsensus të gjerë.
Ndaj dhe Institucioni i Presidentit të Republikës, iu përgjigj kërkesës për bashkëpunim dhe konsensus nga ana e Kuvendit dhe Qeverisë, për ndryshimet në Kodin Penal.
Diskutimi i gjerë tekniko- juridik, ka çuar në përmirësime thelbësore të produktit të votuar nga Kuvendi.
Nisur nga këto zhvillime, nga kjo gjendje e fatkeqësisë natyrore në të cilën ndodhemi, por mbi të gjitha, për shkak të boshllëkut ligjor që ka Kodi Penal sa i përket trajtimit të veprimeve që kryhen me dashje dhe qëllimin kriminal për përhapjen e sëmundjeve infektive, Presidenti vlerëson se iniciativa e Kuvendit dhe Qeverisë që mbrojtja e shëndetit publik të garantohet edhe nga normat penale, përpos atyre administrative, duhet mbështetur.
Presidenti i Republikës konstaton se mes draftit të propozuar nga deputetët, atij të miratuar në Komisionin përgjegjës për çështjet ligjore, dhe përmbajtjes së ligjit nr. 35/2020 të miratuar në seancë plenare, ka ndryshime thelbësore pozitive, të cilat kanë reflektuar një pjesë të sugjerimeve të Avokatit të Popullit, shoqërisë civile, ekspertëve të së drejtës dhe të Institucionit të Presidentit të Republikës, që lidheshin veçanërisht me:
Llojin dhe masën e dënimit penal në përputhje me parimin e ligjshmërisë dhe të sigurisë juridike;
Qartësimin e veprimeve apo mosveprimeve që ngarkojnë me përgjegjësi penale;
Aplikimin e sanksionit penal, në mënyrë të përshkallëzuar, vetëm pasi të jetë aplikuar më parë sanksioni administrativ;
Përcaktimin në mënyrë të qartë të përgjegjësisë penale në rastin e përhapjes së sëmundjes infektive të përfshirë në listën e sëmundjeve infektive me rrezikshmëri të lartë për shëndetin sipas ligjit të posaçëm, vetëm për veprime të kryer me dashje dhe nga personat e diagnostifikuar si mbartës të saj;
Saktësimin e rrethit të subjekteve, duke bërë që norma penale të aplikohet vetëm mbi:
personat “që janë paralajmëruar më parë me një masë administrative për respektimin e masave”,
personat “e diagnostifikuar si mbartës”, apo
për personat “të cilëve u është njoftuar detyrimi i zbatimit të urdhërimeve nga organet kompetente”.
Këto përmirësime thelbësore të dispozitave, që kanë ulur dukshëm masat e dënimit si dhe evidentuar më qartë elementët dhe format e konsumimit të këtyre dy figurave të veprave penale, respektojnë më shumë parimin e sigurisë juridike dhe proporcionalitetit. Ndërkohë, Presidenti i Republikës vlerëson se është e domosdoshme që përpara hyrjes në fuqi të këtyre dispozitave të reja në Kodin Penal:
Ministria e Shëndetësisë dhe Mbrojtjes Sociale, Komiteti i Ekspertëve dhe Komiteti Ndërministror i Emergjencave Civile, duhet të vlerësojnë plotësimin e kuadrit ligjor apo nënligjor që lidhet drejtpërdrejtë me aplikimin e legjislacionit penal, si dhe përcaktimin e qartë dhe shterues sipas ligjit nr. 15/2016 të listës së sëmundjeve infektive të rrezikshme, që lidhen me zbatimin e masave të jashtëzakonshme, procedimin administrativ apo penal;
Të gjitha kufizimet, masat e veçanta apo rregullat, shkelja e të cilave sjell sanksione administrative e më pas penale, të nxjerra nga ministri i Shëndetësisë dhe Mbrojtjes Sociale, Këshilli i Ministrave apo çdo organ tjetër i ngarkuar nga ligji, duhet t`i nënshtrohen një fushate të gjerë e të vazhdueshme informimi publik, përpos botimit të detyrueshëm dhe brenda afatit në Fletoren Zyrtare; Fushata e informimit duhet të përfshijë edhe normat e reja penale; Pushteti vendor dhe Qeveria duhet të rrisin kapacitetet e tyre për t`iu përgjigjur në kohë kërkesave dhe nevojave jetësore të shtresave më në nevojë dhe pensionistëve të cilëve u është kufizuar totalisht liria e qarkullimit; Njoftimi i menjëhershëm dhe i drejtpërdrejtë i personave të diagnostifikuar, karantinuar apo izoluar, dhe i të afërmve të tyre dhe personave të tyre të kontaktit, duhet të jetë i dokumentuar.
Rritja e numrit të testimeve duhet të jetë qëllim i vazhduar i Qeverisë. Një bashkëpunim midis Ministrisë së Shëndetësisë dhe Mbrojtjes Sociale, Institutit të Shëndetit Publik, Ministrisë së Brendshme, Drejtorisë së Përgjithshme të Policisë së Shtetit, Prokurorit të Përgjithshëm, Këshillit të Lartë Gjyqësor dhe Këshillit të Lartë të Prokurorisë, është i domosdoshëm, për hartimin e udhëzimeve integrale që do të orientojnë Policinë e Shtetit, prokurorët dhe gjyqtarët për aplikimin e dispozitave të reja të Kodit Penal, bazur në kritere të qarta teknike dhe aktet ligjore e nënligjore në fuqi. Miratimi i këtyre udhëzimeve dhe publikimi i tyre, duhet t`i paraprijë hyrjes në fuqi të dispozitave të reja të Kodit Penal, për të patur një zbatim objektiv, në përputhje me parimet kushtetuese dhe me rrethanat që kanë diktuar miratimin e këtyre normave të reja penale në këto momente.
VAZHDO TË LEXOSH MË TEPËR PËR TEMËN
