Klubet e Kategorisë Superiore në bashkëpunim me Ligën Profesioniste kanë vendosur të bojkotojnë kampionatin deri në plotësimin e katër pikave të parashtruara për plotësim nga qeveria.
Edi Rama ditën e djeshme në zyrtarizimin e Ligës Unike të Basketbollit është vënë më shumë në dijeni në lidhje me këtë bojkot të klubeve të Superiores dhe ka caktuar Fidel Yllin, deputetin e Partisë Socialiste dhe nismëtar i shumicës së projekteve sportive në vendin tonë, të negociojë.
“Si i ngarkuar nga Qeveria, së cilës i janë drejtuar edhe kërkesat e Ligës Profesioniste, me porosi dhe i ngarkuar nga kryeministri Rama, ftoj përfaqësuesit e Ligës Profesioniste të Futbollit në një tryezë pune për të gjetur rrugët e zgjidhjes së kërkesave që ata kanë.
Qeveria shqiptare dhe mazhoranca kanë patur vëmendjen e plotë te infrastruktura ligjore, duke miratuar një seri ligjesh dhe në këtë kuadër mirëpres Ligën Profesioniste të Futbollit për të negociuar dhe gjetur rrugët e mundshme të zgjidhjes.
Vullneti nuk ka munguar asnjëherë dhe predispozicioni është i përhershëm. Mirëpres në çdo moment komunikimin për ngritjen e shpejtë të programit të diskutimeve”, u shpreh Ylli për tv “ABC”.
Nesër do të ketë një mbledhje të jashtëzakonshme të klubeve ku do të diskutohet në lidhje me: diskutimin nëse do të vijojë futbolli pas reagimit të qeverisë dhe qëndrimi që do të mbahet në negociata me qeverinë.
Por edhe në rend dite do të jenë përcaktimi i grupit negociator, apo dhe diskutimi për masat e mëtejshme që mund të merren e deri në përshkallëzimin e protestave të klubeve dhe Ligës. Në thelb do të jenë edhe kërkesat që kanë klubet ndaj Qeverisë dhe Kuvendit të Shqipërisë.
VAZHDO TË LEXOSH MË TEPËR PËR TEMËN
“Futbollistët si skllevër, si punëtorë fasonesh”
