Ministrja e Shëndetësisë Ogerta Manastirliu iu është përgjigjur nga Spitali Infektiv akuzave të Partisë Demokratike, e cila deklaroi sot se sistemi shëndetësor është në kolaps. Manastirliu është takuar me shefen e Infektivit Najada Çomo e cila ka informuar për gjendjen në spital dhe kapacitetet aktuale.
Manastirliu deklaroi se nuk ka kolaps të sistemit shëndetësor dhe iu ka këshilluar mjekëve të mos i marrin për bazë deklaratat politike. Ministrja tha më tej se shteti është i përgatitur për çdo skenar.
“Nuk ka kolaps të sistemit shëndetësor. COVID nuk është lojë, e gjithë bota është në vështirësi. Jemi të përgatitur për disa skenarë. Spitali ‘COVID 3’ do hapet kur të ezaurohen kapacitetet”, deklaroi ministrja.
Gjatë inspektimit të ministres së Shëndetësisë Ogerta Manastirliu në Spitalin Infektiv, Shefja e Shërbimit prof.Najada Çomo ka bërë me dije se në këtë spital ka ende kapacitete të lira dhe stafi mjekësor është në gatishmëri në 24/7 për t’ju ofruar shërbim pacientëve të prekur me COVID19.
“Ne jemi në krye të detyrës, sa i takon gjendjes në spitalin infektiv, natyrisht kemi një numër të shtuar të rasteve të personave të infektuar, që evidentohet edhe në shtimin e numrit të pacientëve të shtruar në të dy spitalet COVID. Aktualisht spitali ka një kapacitet të shtuar në krahasim me vitet e tjera dhe sot që flasim ne kemi një numër të caktuar shtretërish të pacientëve që kanë nevojë të marrin shërbim në kushte spitalore. Edhe me spitalin COVID 2 janë aktualisht mbi 50 shtretër si kapacitete të lira”, deklaroi Çomo.
Ajo tha se situata është dinamike ndaj dhe kujdesi që qytetarët duhet të tregojnë për zbatimin e masave ndaj COVID-19 duhet të jetë edhe më i madh.
