Përfaqësuesi i grupit të partive popullore evropiane në Parlamentin Evropian, Michael Gahler thotë se kryeministri Edi Rama hodhi hije të errëta mbi zgjedhjet e ardhshme parlamentare.
Duke reaguar pas miratimit të Kodit Zgjedhor, Gahler thotë se ky veprim qartësisht pengon integrimin evropian të Shqipërisë.
Ai bën thirrje Presidentit Ilir Meta që të mos e dekretojë ligjin, ndërsa i bën thirrje kryeministrit Rama që të rishikojë vendimin e tij.
- Reagimi i plotë:
Duke votuar sot shkeljen e Marrëveshjes së 5 Qershorit të negociuar nga Bashkimi Evropian me opozitën, kryeministri shqiptar Edi Rama hodhi një hije të errët mbi zgjedhjet e ardhshme të prillit, të cilat duhet të ishin të lira e të ndershme, dhe më të mira se të mëparshmet.
Me këtë veprim Rama qartësisht pengon integrimin evropian të Shqipërisë. Më saktësisht, shkelja e marrëveshjes së 5 Qershorit rrezikon të bllokojë dhe të shtyjë Konferencën e parë Ndërqeveritare si hapin e parë për fillimin e negociatave të pranimit në BE.
Shqipëria meriton shumë më mirë se kaq. Ne i bëjmë thirrje Presidentit ti kthejë ligjin e sotëm Parlamentit. Ne i bëjmë thirrje Kryeministrit Rama të rishikojë pozicionin e tij për hir të së ardhmes evropiane të popullit shqiptar.
