Inter është ndalur sërish, kësaj here në transfertë ndaj Atalantas. Të besuarit e Antonio Contes kaluan të parët në avantazh, por nuk arritën ta mbanin deri në fund dhe mbyllet 1-1. Roma fiton 3-1 në Genoa dhe ngjitet e treta.
Në minutën e 58-të, vjen goli i miqve. Brozovic pason shumë mirë për Ashley Young në të majtë. Anglezi hedh në zonë një krosim të bukur dhe Lautaro Martinez e kthen në gol me një goditje të shkëlqyeshme me kokë.
Me disavantazhin Gasperini ndryshon: Miranchuk bën debutimin e tij dhe Muriel dhe Lammers në vend të Zapata dhe Toloi. Zëvendësimet i japin jetë të re sidomos ekipit të Gasperinit.
Muriel është i frymëzuar dhe në minutën e 79-të punon një top të shkëlqyeshëm vetëm për Aleksey Miranchuk: rusi kontrollon, i shmanget përpjekjes për ta mbuluar nga Bastoni dhe Gagliardini, duke gjetur këndin e djathtë për 1-1 me një të majtë kirurgjikale.
Henrik Mkhitaryan 3, Genoa 1! Mund të quhet kështu ndeshja e sotme e luajtur në “Marassi”, aty ku armeni ka marrë skenën duke shënuar plot tri herë në portën kuqeblu. Në fillim të pjesës së parë me kokë, më pas duke u futur në zonë dhe realizuar fluturimthi dhe në fund me një goditje të jashtëzakonshme pa u menduar.
Në mes, barazimi i përkohshëm i Marco Pjaca. Një sukses i merituar ky për Roma dhe hat-trick i parë për armenin në Serie A! Që nga fillimi i sezonit 2015-2016 – statistikat e Opta – armeni është një nga dy lojtarët që ka shënuar të paktën 10 gola në tre nga pesë ligat kryesore evropiane, së bashku me Zlatan Ibrahimovic.
