Vllaznia e femrave në futboll arriti një rezultat të shkëlqyer në kualifikueset e turit të parë të Ligës së Kampionëve, teksa eliminuan kampionet e Turqisë, ALG Spor Kulubu. Vajzat shkodrane bënë një paraqitje historike.
Ato nuk u dorëzuan për asnjë moment edhe kur ishin në disavantazh 2-3, ndërsa barazuan në minutën e 118, teksa më pas u treguan më të sakta nga pika e bardhë. Kështu, aventura europiane e vajzave kuqeblu vazhdon ende dhe ditën e sotme kanë mësuar kundërshtarin e radhës.
Bëhet fjalë për një tjetër ekip kampion siç janë ato të FC Minsk, ekipit bjellorus. Sigurisht, vështirësia rritet në turin e dytë, megjithatë pozitive është fakti se ndeshja do të luhet sërish në “Loro Boriçi”, ndërsa mbetet për t’u vendosur nëse do të luhet më datë 18 apo 19 nëntor.