Në janar të këtij viti, kohë kur lejoheshin dasmat dhe të tjera organizime të ngjashme dhe bota jetonte si zakonisht, Capital T dhe Mozzik ishin të pranishëm në dasmën e një miku të përbashkët. Ata madje pozuan në një foto, e cila qarkulloi nëpër internet dhe u përfol si një bashkëpunim i mundshëm. E dimë, sa naivë janë fansat ndonjëherë.
Sidoqoftë, në fund të nëntorit, Capital T, i ftuar në emisionin “Gjoni Black” me moderatorin Meriton Mjekiqi, këndoi freestyle (improvizim) – ndonëse një pjesë e njerëzve vë në dukje se reperi këndoi playback.
Dakord, po ç’hyn Mozzik këtu? Në freestyle-in e quajtur “Story”, Capital T thotë (min.56:00):
“Femra ta ka rrit morrin,
nuk vrehesh as me tesha t’fosforit,
ma reper se ti osht Lori [sic].”
Djemtë nuk ndiqen në rrjete sociale (Capital T ndjek Loredanën, kjo e fundit nuk e ndjek). Pas publikimit të intervistës në “Gjoni Black”, Mozzik postoi një foto ku shkruhet “Hustle, baby, hustle” (ngutu, vogëlush, ngutu).
