Shefi i kabinetit në Presidencë Edmond Panariti ka reaguar në lidhje me frikën që ekziston tek shumë qytetarë për bërjen e vaksinës kundër COVID-19.
Në një postim në facebook, Panariti i drejtohet të gjithë skeptikëve duke iu rikujtuar se sapo një foshnjë vjen në jetë i bëhen vaksina kundër një sërë sëmundjesh vdekjeprurëse.
Kështu Panariti thekson se edhe për këtë pandemi, zgjidhja e qëndrueshme është vaksina, ndërsa shton se nuk është e detyrueshme bërja e saj dhe secili është i lirë të vendosë për vete.
Postimi i plotë:
Për të gjithë skeptikët dhe atyre që janë kundër vaksinave përfshire dhe atë të covid – 19!
Që kur jeni lindur dhe madje pa ju pyetur fare që në ditët e para dhe në fazat e hershme të fëminisë, me miratimin e prindërve tuaj të mënçur dhe të përgjegjshëm ju kanë vaksinuar kundër një sërë sëmundjesh vdekjeprurëse, si lija, difteria, fruthi, poliomieliti, tetanozi etj..
Përndryshe, ja u them me bindje që një pjesë e mirë juaja nuk do të ishte në jetë sot e kësaj dite.
Njerëzit para vaksinave, vdisnin në masë dhe veçanërisht mortaliteti foshnjor ishte i frikshëm..
Shihni krahun apo kofshën tuaj dhe me siguri atje do të gjeni gjurmët e vaksinimit jetëshpëtues tuajin.
Edhe për këtë pandemi, zgjidhja e qëndrueshme është vaksina.. Nuk është e detyrueshme bërja e saj , secili është i lirë të vendosë për vete…
Por shihni pas në kohë dhe mësoni nga historia.
