Presidenti i SHBA-së Joe Biden me të drejtë do të kalojë ditët e tij të para në zyrë duke adresuar krizat e panumërta të brendshme që ai ka trashëguar nga paraardhësi i tij, Donald Trump. Sidoqoftë, transferimi i pushtetit në zyrën më të fuqishme të zgjedhur në botë zakonisht do të thotë një ndryshim edhe në politikën e jashtme.
Dhe nëse fjalimi inaugurues i Presidentit Biden është diçka ku mund të bazohemi, fokusi global për katër vitet e ardhshme do të jetë kryesisht për të rivendosur besimin e botës tek Amerika pas politikës së jashtme kaotike të administratës prej një-mandati të Trump. Në fjalimin e tij, Biden foli për një moment “rinovimi dhe vendosmërie” dhe e përshkroi fitoren e tij si “triumfin e një kauze, kauzën e demokracisë”.
Por çfarë do të bëjë presidenti i 46-të amerikan për të rekuperuar demokracinë në të gjithë botën që Trump me sa duket tentoi shumë ta dëmtojë.
Gjatë gjithë fjalimit të tij, Biden përsëriti rëndësinë e rivendosjes së unitetit dhe rregullimin e demokracisë në të gjithë Amerikën. Ai foli, ashtu si shumë presidentë kanë bërë para tij, se Amerika është një fener për botën.
Nuk është sekret që nën drejtimin e Trump, roli i Amerikës si vendi i ndritshëm në kodër ishte dëmtuar rëndë. Ai përdori zyrën presidenciale për të thënë gënjeshtra të parëndësishme, në përpjekje për të shtypur votat postare, duke promovuar teori konspirative në lidhje me legjitimitetin e zgjedhjeve amerikane ose duke u kënaqur me diktatorët dhe regjimet që shkelnin popullatat e tyre, Trump hodhi poshtë besueshmërinë e Amerikës në skenën botërore.
‘Roli i Amerikës në botë’
Fjalimi i Biden nuk bëri ndonjë njoftim të rëndësishëm për politikën e jashtme, por ai u përpoq të siguronte ata që vëzhgonin nëpër botë se Amerika e tij do të jetë një partnere global më i besueshëm dhe më i qëndrueshëm. “Mesazhi i tij i drejtpërdrejtë për ata përtej kufijve tanë” ishte se Amerika ishte testuar, por që ajo “do të riparojë aleancat tona dhe do të angazhohet edhe një herë me botën” si një “partner i besuar për paqen dhe sigurinë”.
Kjo sugjeron një kthim në epokën para-Trump të Amerikës që udhëheq rendin perëndimor, duke mbështetur NATO-në dhe duke rivendosur një qasje shumëpalëshe ndaj politikës së jashtme. Ai tashmë ka njoftuar se do të ribashkohet me marrëveshjen e klimës në Paris dhe ka shumë të ngjarë që ai të provojë dhe të hapë bisedime me partnerët që nënshkruan marrëveshjen bërthamore të Iranit nën drejtimin e Barak Obama.
Sidoqoftë, përmbysja e disa veprimeve globale të armiqësisë së Trump mund të jetë më pak e thjeshtë sesa lëshimi i disa urdhrave ekzekutivë. Vetëm javën e kaluar Trump ndezi një seri zjarresh diplomatike që Biden duhet të kujdesej për të rivendosur rendin.
Ai hoqi kufizimet në kontaktet midis zyrtarëve amerikanë dhe përfaqësuesve nga Tajvani; i quajti rebelët Houthi në Jemen si një organizatë e huaj terroriste; dhe e quajti Kubën një shtet sponsor të terrorizmit.
Dhe në ditën e tij të fundit të plotë në detyrë, administrata e tij akuzoi Kinën për kryerjen e gjenocidit kundër myslimanëve ujgurë dhe grupeve etnike dhe fetare të pakicave që jetojnë në rajonin veriperëndimor të Xinjiang.
Pavarësisht nga meritat e ndryshme të këtyre politikave, ato kanë dëmtuar marrëdhënie që një president i ri amerikan do të trashëgojë dhe do të duhen më shumë se fjalë të qeta për t’i zgjidhur ato.
Akti i parë i Biden si President ishte lutja për qetësi dhe unitet në Amerikë.
Ishte mesazhi i duhur për audiencën e tij të brendshme. Sidoqoftë, aleatët dhe armiqtë e Amerikës e dinë mirë se Presidenti i ri ka një mori punësh dhe ndërsa ai ka premtuar të ribashkohet me Organizatën Botërore të Shëndetësisë dhe marrëveshjen e Parisit, ajo që do të duket udhëheqja e SHBA në një peizazh global të ndryshuar është ende shumë shumë e paqartë.
Sa më shumë kohë që Biden merr për të rivendosur vendin e tij si udhëheqës i botës së lirë, aq më shumë ata që gëzuan mungesën e interesit të Trump në punët e jashtme do të kërkojnë të shfrytëzojnë boshllëkun e lënë nga Amerika ndërsa ajo ndodhet në një vend të prapambetur në skenën botërore.
Përkthyer dhe përshtatur nga cnn/ F.H, Konica.al
VAZHDO TË LEXOSH MË TEPËR PËR TEMËN
