Administrata amerikane ka përcaktuar që Kina ka kryer gjenocid dhe krime kundër njerëzimit kundër myslimanëve ujgurë dhe grupeve të pakicave etnike dhe fetare që jetojnë në Xinjiang, një rajon i largët në perëndimin e largët të Kinës.
“Ky gjenocid është duke vazhduar dhe se ne jemi dëshmitarë të përpjekjes sistematike për të shkatërruar ujgurët nga partia-shtet kineze“, tha Sekretari i Shtetit i SHBA Mike Pompeo në një deklaratë të martën, në ditën e fundit të plotë të administratës Trump.
Departamenti i Shtetit i ShBA ka vlerësuar më parë se deri në dy milion ujgurë, si dhe anëtarë të grupeve të tjera të pakicave nyslimane, janë arrestuar në një rrjet të gjerë të kampeve të internimit në rajon.
Pekini ka mbrojtur prej kohësh goditjen atje si të nevojshme për të luftuar ekstremizmin dhe terrorizmin. Por të dhënat e qeverisë të lëshuara vitin e kaluar zbuluan se njerëzit mund të arrestoheshin thjesht për “veshjen e një velloje” ose për “mjekër të gjatë“.
“Që të paktën nga marsi i vitit 2017, autoritetet lokale përshkallëzuan në mënyrë dramatike fushatën e tyre të shtypjes për dekada të tëra kundër myslimanëve ujgurë dhe anëtarëve të grupeve të tjera të pakicave etnike dhe fetare, duke përfshirë kazakët etnikë dhe kirgizët etnikë,” tha Pompeo.
“Autoritetet [kineze] kanë kryer sterilizime dhe aborte të detyruara mbi gratë ujgure, i kanë detyruar ato të martohen me jo-ujgurë dhe kanë ndarë fëmijët ujgurë nga familjet e tyre,” tha ai gjithashtu.
Administrata e ardhshme e Biden, ka të ngjarë të vazhdojë presionin e SHBA mbi çështjen. Fushata e Presidentit të zgjedhur tashmë ka lëshuar një deklaratë duke thënë se i konsideron veprimet e Kinës në rajon “gjenocid”.
Xinjiang është shtëpia e rreth 11 milion ujgurëve, një pakicë etnike kryesisht myslimane që flasin një gjuhë të lidhur ngushtë me turqishten dhe kanë kulturën e tyre të veçantë.
Ish-të burgosurit e kampit të riedukimit më parë i kanë thënë CNN se kishin përjetuar indoktrinim dhe abuzim politik brenda kampeve, të tilla si mungesa e ushqimit dhe gjumit dhe injeksione të detyrueshme.
Në fillim të këtij muaji, SHBA ndaloi importet e produkteve të pambukut dhe domateve të prodhuara në rajonin Xinjiang të Kinës për shkak të shqetësimeve të punës së detyruar.
