Ditën e sotme, në Dibër po zhvillohet seanca e dytë gjyqësore për dosjen ‘184’, që ka të bëjë me shitblerjen e votës në zgjedhjet e lokale të 2016. Të pandehurit janë Robert Aga, Drini Gjeci, Nuri Meda dhe Hasan Hoti. Gjykata pritet të vendosë nëse do ta kalojë çështjen në gjyq apo do ia kalojë prokurorisë.
Kujtojmë dosja 184 vjen para gjykatës së Dibrës pas një ping-pongu të gjatë mes institucioneve të drejtësisë. Nga krimet e renda kjo dosje bëri rrugën Tiranë-Dibër për 4 herë vajtje-ardhje deri sa prokurorët aty u bindën që ishte kompetencë e tyre dhe pranuan ta hetojnë. Sipas akuzës së Dibrës në zgjedhjet lokale të 2016 ku do të zëvendësohej Shukri Xhelili me Agim Ramën, ka pasur shit-blerje votash por personat përgjegjës s’mund të hetoheshin pasi vepra penale ishte parashkruar.
Për të tjerët të akuzuar, mes tyre kryebashkiakun aktual të Dibrës Dionis Imeraj, dhe shtetasit Imer Lala, Arben Keshi, Bekim Krashi, afrim Mikli, Prokuroria e Dibrës kërkoi më 18 dhjetor pushimin e çështjes dhe tani i takon gjykatës të japë vendimin e saj nëse do pranojë këtë hetim apo do e rikthejë sërish në Prokurori.
Kujtojmë se PD, si kallëzues palë e interesuar e ka ankimuar vendimin dhe kërkon të vihen përballë ligjit të gjithë persona e përgjuar në këtë dosje.
