Janë disa lojtarë që thjesht me hyrjen në fushë regjistrojnë rekorde. Një i tillë është padyshim edhe Lionel Messi, u shfaq në versionin e tij më të mirë në ndeshjen ndaj Alavesit në fitoren 5-1, ku realizoi dygolësh.
Kjo sfidë shënoi një tjetër arritje për 33-vjeçarin: ia barazoi rekordin e legjendës Xavi Hernandez (aktualisht trajner i Al-Sadd në Katar) me plot 505 ndeshje me fanellën “blaugrana” në La Liga.
Shumë shpejt do të thyejë rekordin e Xavit sa i përket numrit të ndeshjeve në total. Ish-mesfushori, kur u tërhoq nga Barcelona, kishte zhvilluar 767 takime, ndërsa Messi kundër Alavesit luajti takimin numër 759.
Kapiteni aktual i Barcelonës është lojtari me më shumë gola (651) dhe më shumë fitore (530) me “blaugranat”. Messi hyn në histori duke përmirësuar rekordet e Xavit.
Do të ketë së shpejti më shumë ndeshje të luajtura me fanellën e Barcelonës, por ai tashmë e ka lënë pas ish-mesfushorin me 51 fitore më shumë (ka 24 barazime më pak dhe sigurisht 28 humbje më pak).
Sa u përket golave të shënuar, diferenca është e madhe: 399 gola më shumë se Xavi. Messi gjithashtu ka më shumë minuta në fushë se Xavi (+1544), ka luajtur më shumë ndeshje si titullar (+5) dhe i ka mbyllur të plota ndeshjet në më shumë raste (+69).
Messi i është bashkuar ekipit të parë në moshë më të re se Xavi. Debutoi në La Liga në radhët e Barcelonës kur ishte 17 vjeç, tre muaj dhe 21 ditë, në Espanyol-FC Barcelona (0-1), ndërsa Xavi në debutim ishte 18 vjeç, 8 muaj dhe 7 ditë, në Valencia-FC Barcelona (1- 3).
Me 505 ndeshje në La Liga, Messi tashmë në top-10. Rekordmeni mbetet Andoni Zubizarreta me 622 ndeshje, i ndjekur nga Joaquín Sánchez 567. Më pas vijnë Raúl González (550), Eusebio Sacristán (543), Paco Buyo (542), Manolo Sanchis (523), Iker Casillas (510) dhe Sergio Ramos (506). Këto rekorde Messi mund t’i thyejë vetëm nëse qëndron në Spanjë.
VAZHDO TË LEXOSH MË TEPËR PËR TEMËN
Barça me “pesë yje”, Messi dopietë
Rubiales paralajmëron revolucion në La Liga
