Ema Andrea një nga aktoret më të njohura shqiptare, e cila të qënit personazh publik, e ka përdorur gjithmonë për mbrojtjen e të drejtave të grave.
Për këtë arsye ajo flet në vetën e parë, në një rrëfim krejtësisht personal pa dorashka.
Ajo ka thënë më herët se femrat që i pranojnë ngacmimet seksuale dhe bien pre e tyre për t’u rritur në punë, nuk do të shkëputen kurrë nga kjo kërkesë, pasi ngacmimet nuk do të mbarojnë kurrë.
RRËFIMI I AKTORES:
“Kam pasur nga të dyja rastet si, bashkëpunëtorë burra që kam punuar mirë, jam respektuar për profesionin, kemi ecur përpara shumë mirë. Si dhe ato raste kur refuzimi apo çdo gjë tjetër që ka qenë kompleksive në personin që ka patur pushtet, e ka përdorur këtë pushtet ose këtë ‘Jo’ ose këtë refuzim, për të mos më dhënë atë që meritoj kur kam patur nevojë.
Në fillim nuk e kupton. Thua ‘ku është gabimi im?’. Ja, kjo është pyetja që të lodh shumë: ‘Çfarë bëra unë që t’i krijoj idenë se kam aq nevojë sa të mund të krijoj raporte banale?.Ka qenë e vështirë ngritja e karrierës, ecja përpara, konsideromi, të pranuarit në profesion. Gjë që më ka bërë më të fortë, më ka bërë të kërkojë forma të tjera të reja. Por kur largohem në distancë kuptoj që kam humbur mundësi që i kam merituar. Dhe kjo natyrisht që e ka bërë më të vështirë. Paguan me vetmi, paguan me paragjykim, paguan me përjashtim”.- tregon Ema në një intervistë për DW.
