Ka ardhur rezultati më surprizë i eliminatoreve. Gjermania ka humbur, ndërsa festojnë Italia dhe Franca. Rezultati më befasues është regjistruar në Gjermani, ku skuadra e Loë është mundur 2-1 nga Maqedonia e Veriut.
Gjermanët nuk humbnin një ndeshje kualikuese të Botërorit që nga viti 2001, kur janë mundur 5-1 nga Anglia. Pandev ka kaluar në avantazh miqtë në fundin e pjesës së parë falë një asisti të bukur nga Bardhi.
Vendasit kanë barazuar përkohësisht në minutën e 63-të me një penallti të Gundogan, por kanë pësuar golin e dytë pesë minuta para fundit. Një gol që është shënuar nga mesfushori i Napoli-t, Elmas.
Kjo humbje e ka zbritur Gjermaninë në vendin e tretë të Grupit J. Grupi kryesohet nga Armenia, që ka mundur 3-2 Rumaninë. Ka ardhur fitorja e parë në grup për Islandën, që ka mundur 4-1 Lihtenshtejnin.
Italia ka përforcuar vendin e parë në Grupin C pas fitores 2-0 të marrë në transfertë kundër Lituanisë. Sensi-t (47′) dhe Immobile (94′, pen) kanë shënuar për Axurrët e Mancini-t. Italia ka shkuar në 25 ndeshje radhazi pa humbje, duke barazuar rekordin e 2006. Takimi tjetër i këtij grupi, ai i luajtur mes Irlandës së Veriut dhe Bullgarisë është mbyllur 0-0.
Fitore 1-0 edhe për Francën në fushën e Bosnje Hercegovinës. Heroi i takimit ka qenë Antoine Griezmann, i cili ka shënuar golin e fitores në minutën e 60-të me një goditje të bukur me kokë. Franca kryeson Grupin D me 7 pikë. Është mbyllur në barazim 1-1 ndeshja tjetër e këtij grupi mes Ukrainës dhe Kazakistanit.
Vazhdon dominimi i Danimarkës në Grupin F. Danezët kanë marrë fitoren e tretë radhazi pasi kanë mundur bindshëm 4-0 Austrinë në transfertë. Fitore me “poker” edhe për Skocinë dhe Izraelin, që kanë mundur respektivisht Ishujt Faroe dhe Moldavinë.
VAZHDO TË LEXOSH MË TEPËR PËR TEMËN
Spanja nuk fal, Kosova tregohet dinjitoze
