Në një nga lagjet me karakteristike të Vlorës, në Çole, drejtuesi politik i Partisë Socialiste për këtë Qark, Damian Gjiknuri, i shoqëruar nga deputetët aktualë Vilma Bello e Fate Velaj dhe kandidati Ilir Metaj, u shpreh i bindur për fitoren e PS
“Lagjia Çole po njeh ndryshime të dukshme me qëllim urbanizimin e kësaj zone, njësoj siç është bërë qendra e Vlorës. Mandati i tretë qeverisës do të jetë pikërisht për investime të mëtejshme në këto zona. 9 mandatet që Partia Socialiste do të marrë në zgjedhjet e 25 prillit do të jenë tregues i mirënjohjes së vlonjatëve ndaj punës së bërë, investimeve konkrete dhe transformimit rrënjësor të Vlorës në këto dy mandate qeverisëse”, u shpreh Gjiknuri.
Në fjalën e tij para banorëve, Gjiknuri deklaroi se vota e 25 Prillit duhet të jetë një votë për të garantuar stabilitetin dhe qëndrueshmërinë e projektit politiko-ekonomik të qeverisë për Vlorën.
Kandidati për deputet në rajonin nr.4 Ilir Metaj ftoi të gjithë banorët e zonës ta mbështesin Partinë Socialiste, të vetmen alternativë të qytetarëve. Metaj pohoi se “do të jetë një zë i fortë i banorëve të rajonit 4, duke e justifikuar me punë mbështetjen e tyre”. Në fjalën e saj deputetja aktuale Vilma Bello theksoi rëndësinë e votës për Partinë Socialiste, si e vetmja alternativë e cila do të mundësojë vijimin e reformave transformuese për Vlorën.
