Ambasada Amerikane në Tiranë i është përgjigjur Prokurorisë lidhur me kërkesën për informacione mbi Tom Doshin.
Përgjigjja vjen pasi organi i akuzës kërkoi informacione lidhur me kandidatin e PSD-së në Tiranë dhe Shkodër.
Pas marrjes së përgjigjes nga ana e ambasadës amerikane, Prokuroria e Përgjithshme pret informacione lidhur me Doshin edhe nga ana e Interpolit. Ambasadorja Yuri Kim ka kërkuar ndalimin e kandidimit të Doshit në zgjedhje.
Ambasadorja ka sjellë vazhdimisht në vëmendje vendimin e DASH, ku Doshit i ndalohet hyrja në Shtetet e Bashkuara që në vitin 2018 për shkak se “është i përfshirë në korrupsion të nivelit të lartë”.
Organi i akuzës bën po ashtu me dije se ka mbyllur hetimet edhe për një tjetër kandidat Zef Hilën. Përfundimet për kandidatin e Aleancës PD-AN ia janë dërguar tanimë Komisionit Qendror të Zgjedhjeve. Sjellim në vëmendje që KQZ kishte kërkuar një verifikim më të thelluar për kandidatin në fjalë.
Njoftimi
Prokuroria e Përgjithshme në zbatim të ligjit nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike”, Vendimit nr. 17/2016 të Kuvendit të Republikës së Shqipërisë, si dhe urdhrit të Prokurorit të Përgjithshëm nr. 41, datë 11.02.2020 përfundoi verifikimin për 1 (një) subjekt vetëdeklarues, kandidat në zgjedhjet parlamentare të 25 prillit dhe ia përcolli organit kompetent, në këtë rast Komisionit Qendror të Zgjedhjeve rezultatet e verifikimit (në zbatim të nenit 12 e 13 të Kreut V të Vendimit të Kuvendit nr.17/ 2016), për të shqyrtuar nëse janë evidentuar të dhëna që përfshihen në sferën e kufizimeve të nenit 2 të ligjit nr. 138/2015 dhe në vijim dhe të vlerësojë nëse ato janë brenda periudhës së ndalimit të përcaktuar në nenin 4 të po këtij ligji.
Sektori i Dekriminalizimit në Prokurorinë e Përgjithshme është në komunikim të vazhdueshëm me të gjitha institucionet e përfshira në këtë proces dhe po trajton të gjitha kërkesat e përcjella, për verifikim të thelluar e të plotë të të dhënave të pasqyruara në Formularët e Vetëdeklarimit nga personat, subjekte të këtij ligji që garojnë për zgjedhjet parlamentare të 25 prillit.
VAZHDO TË LEXOSH MË TEPËR PËR TEMËN
