Kryeministri Edi Rama është pyetur lidhur me paratë që ka marrë borxh për pandeminë, por nuk ka arritur të japë një shpjegim të qartë.
I ftuar në emisionin “Të Paekspozuarit” nga Ylli Rakipi, kreu i qeverisë u pyet se ku i ka 300 milionë euro të marra për pandeminë.
Si përgjigje, Rama u shpreh se janë përdorur edhe për rindërtim.
Pjesë nga biseda
Rakipi: Për pandeminë keni marrë 500 milionë euro borxh?
Rama: Patjetër, ku është problemi?
Rakipi: 170 mln nga FMN, dy herë nga BE nga 50 mln në pars dhe 180 në korrik, në fund morët 100 mln nga BB tetor. Tani prapë 500 mln. Njerëzve u pagove 130 mln gjithësej. Ja edhe 20 milionë Ministrisë së Shëndetësisë. Po falim edhe 50 milionë. Ku janë 300 milionë të tjera, pse nuk i përdorën për pandeminë?
Rama: Pse hyni në këto? Kur hyni ju në këto, ju që merreni me komentet ekonomike pa qenë brenda tyre…Thoni gjysëm të vërteta.
Rakipi: Ty të pyeti kolegu për GDP-në e Shqipërinë dhe nuk e dije…
Rama: Ne e morëm vendin me borxh 74% në 2013.
Rakipi: E kam pyetje specifike. Po flas për borxhin për pandeminë. Ku i ke çuar 300 milionë euro?
Rama: Ne nga pandemia, kemi marrë një goditje 700 milionë. E kemi marrë në të ardhura. Na kanë rënë të ardhurat e shtetit.
Rakipi: Pagove bizneset ti?
Rama: BB thotë, se qeveria shqiptare shpëtoi 50 mijë vende pune.
Rakipi: Pagove 130 milionë euro njerëzve. Po 300 milionë ku i ke?
Rama: Po rindërtimi?
Rakipi: Nuk kanë lidhje rindërtimin. Janë të pandemisë këto.
Rama: Po patjetër, nuk ka lek për pandeminë vetëm. Na kanë rënë të ardhurat. Në kushtet e pandemisë kanë rënë të ardhurat. Ne kemi financuar rindërtimin, përjashto lagjen në Kurbin, të gjithë e kemi financuar me paratë tona. Shkollat që keni parë i kemi financuar ne.
Rakipi: Po thua që për pandeminë, bëre shkolla..
Rama: Në kohë pandemie morën borxh për të vazhduar për të shpenzuar për programet tona.
Rakipi: Jo duhet t’ju jepnit paratë bizneseve.
Rama: Nëse do të merrnim 500 milionë borxh dhe do t’ua jepnim njerëzit ne sot do të ishim gropë.
Rakipi: Gropën e ke më të madhe se 700 milionë ti. Gropën e borxhit është tjetër. Po flas për pandeminë, nuk më përgjigjesh ku i ke çuar 300 milionë euro.
