Kryeministri Edi Rama, në një takim me fermerët në Moravë të Beratit, ka folur për fashën orare, të vendosur nga Komiteti Teknik i Ekspertëve, për të frenuar përhapjen e pandemisë COVID-19.
Banorët e Moravës, thanë se për ta, është pak i cunguar orari i vendosur deri në orën 20:00, e për këtë arsye, i kërkuan kryeministrin zgjatjen e fashës.
Kryeministri nga ana tjetër, theksoi se ka kërkesa të shumta për rritjen e fashës orare, por sipas tij, jemi në një situatë që nuk duhet të nxitohemi.
Rama shtoi se mund të diskutohet një mundësi për zonat rurale, e theksoi se ndalimi i orareve të natës është bërë për zonat më të populluara, ku aplikohet e ashtuquajtura “jeta e natës”.
“Ka kërkesa për rritje e fashave orare, s’duhet të nxitohemi, sepse Franca u mbyll nga e para. Unë isha në Paris dhe aty ishin të gjitha të mbyllura, vetëm ushqimoret ishin të hapura. Është vala e tretë, është version britanik, është dhe arsyeja që na solli infektime të shumta tek ne. Vdekshmëria është e njëllojtë me atë të mëparshmin, por ka 30% agresivitet më shumë infektimi. Duam të vaksinojmë gjysmë milioni njerëz që në maj. Do e diskutojmë këtë për fshatin. Fasha lidhet me jetën e natës, të cilët mblidhen në zonat e populluara si mizë lisi. Jeta e natës është problemi, megjithatë do e shikojmë e do të bëjmë më të mirën”, tha Rama.
