Në orën 18:41 minuta të pasdites së të premtes përfundoi numërimi i votave preferenciale për kandidatët për deputetë në qarkun e Tiranës.
Nga 36 deputetë që ka qarku, 18 do i çojë në parlament PS, 15 PD, 2 LSI dhe një PSD. Vetëm dy emra arritën që të thyenin herësin duke rrëzuar listën e partisë, Fatmir Xhafaj dhe Ornaldo Rakipi duke nxjerrë jashtë Ervin Bushatin dhe Fidel Yllin.
Pandeli Majko, Mimi Kodheli dhe emra të tjerë të njohur mbetën jashtë, mes të cilëve edhe veterani Spartak Braho dhe Halit Valteri, që pasi u fut në Kuvend nga listat e PD-së u “rilind”. Por edhe mes 18 fituesve ka zhgënjim, pasi disa emra morën shumë pak vota nga sa pritej. E dyta e listës, Najada Çomo do të jetë deputete vetëm me 1583, Ermonela Felaj me 2311 dhe Klotilda Bushka 2973 vota, tepër larg pritshmërive.
Listën e PD-së në Tiranë e kryeson kryetari Basha me 16186 vota, i ndjekur nga Agron Shehaj me 13852, Belind Këlliçi 11581, Grida Duma 8691, Idrizi 7440, Noka 6875 dhe vetëm i shtati Sali Berisha me 6766 vota. Përpos Shehajt surprizë ishte edhe Orjela Nebijaj me 5599, por pa mundur të thyejë herësin. Nga aleatët më pak vota sollën Vangjel Dule 848 dhe Artur Roshi 379.
Po te LSI-ja çfarë ndodhi? Partia e drejtuar nga Monika Kryemadhi mori vetëm 2 mandate në Tiranë. Të të parat në listë që shkojnë në Kuvend janë Kryemadhi me 2446 vota (nëse nuk zgjedh mandatin në Fier) dhe Erisa Xhixho 1066, shumë më pak krahasuar me kreun e partisë për kryeqytetin Përparim Spahiu, i cili grumbulloi 3431 vota. Listën e sfidoi edhe ish-shefja e Tatimeve Brisida Shehaj duke u vendosur e fundit, por që në fund të procesit doli me vetëm 918 vota. /abcnews
