Presidenti turk Rexhep Tajip Erdogan akuzoi të hënën presidentin e SHBA Joe Biden se kishte “duar të përgjakura” për shkak të mbështetjes së Uashingtonit për fushatën e bombardimeve të Izraelit në Rripin e rrethuar të Gazës.
“Ju po shkruani histori me duart tuaja të përgjakura,” tha Erdogan në vërejtjet televizive drejtuar Biden. “Ju na detyruat ta themi këtë. Ne nuk mund të zmbrapsemi,” shtoi presidenti turk.Erdogan kishte kaluar muajt e fundit duke u përpjekur të rregullojë marrëdhëniet e dobëta me Uashingtonin dhe u kishte kontaktuar aleatëve të tjerë perëndimorë pas një viti mosmarrëveshjesh të hidhura.
Por vërejtjet e së hënës përfaqësuan një nga sulmet e tij më të forta ndaj Biden që nga mbërritja e tij në Shtëpinë e Bardhë në janar.
“Sot pamë nënshkrimin e Biden mbi shitjet e armëve në Izrael,” tha Erdogan duke iu referuar raporteve të mediave amerikane për një dërgesë të re armësh të miratuar nga administrata e Biden.
“Territoret palestineze janë të mbushura me persekutim, vuajtje dhe gjak, si shumë territore të tjera që humbën paqen me fundin e Osmanëve. Dhe ju po e mbështesni atë,” tha Erdogan.
Presioni rritet ndaj Bidenit për të vepruar
Komentet e presidentit turk erdhën gjithashtu ndërsa administrata e Biden thuhet se bllokoi Këshillin e Sigurimit të KB për të lëshuar një deklaratë të përbashkët duke kërkuar një armëpushim të menjëhershëm midis Izraelit dhe Hamasit.
Presioni ka qenë në rritje mbi Biden për të kërkuar një armëpushim, pasi bombardimi intensiv i Izraelit i Gazës hyn në javën e dytë.
Kryeministri Benjamin Netanyahu tha të Shtunën se lufta e Izraelit ndaj Gazës “do të marrë kohë” dhe do të vazhdojë “për aq kohë sa është e nevojshme”.
Sipas ministrisë së shëndetit të Gazës, të paktën 212 njerëz, përfshirë 61 fëmijë, janë vrarë që kur Izraeli filloi fushatën e tij ushtarake në Gaza më 10 maj.
Të Dielën, dhjetëra demokratë të Senatit, duke përfshirë ligjvënësin progresiv Bernie Sanders, i kërkuan administratës së Biden të kërkojë një armëpushim të menjëhershëm.
“Për të parandaluar çdo humbje të mëtejshme të jetës civile dhe për të parandaluar përshkallëzimin e mëtejshëm të konfliktit në Izrael dhe territoret palestineze, ne kërkojmë një armëpushim të menjëhershëm,” thanë senatorët.
Erdogan nxit Papën
Ndërkohë, tensionet ziejnë në qytete dhe qyteza përtej Bregut Perëndimor të okupuar dhe Izraelit, ndërsa forcat Izraelite goditën me dhunë protestat e përditshme Palestineze kundër dëbimit të planifikuar të familjeve në lagjen Sheikh Jarrah të Jeruzalemit Lindor të okupuar dhe sulmet ndaj xhamisë al-Aqsa gjatë muajin e shenjtë mysliman të Ramazanit.
Qytetet në Izrael kanë parë gjithashtu konfrontime të armatosura midis qytetarëve palestinezë të Izraelit dhe ultra-nacionalistëve hebrenj, të mbështetur nga policia izraelite.
Turqia ka dënuar vazhdimisht dhunën dhe ka akuzuar Izraelin për kryerjen e “spastrimit etnik, fetar dhe kulturor”.
Më herët të hënën, Erdogan e nxiti Papa Françeskun të ndihmonte në përfundimin e asaj që ai e quajti “masakrën” e Izraelit ndaj palestinezëve, për të cilën ai tha se duhej të dënohej me sanksione./konica.al
VAZHDO TË LEXOSH MË TEPËR PËR TEMËN
Biden mban qëndrim të ashpër ndaj Turqisë
Dështojnë bisedimet për kufirin detar mes Greqisë dhe Turqisë
