Të besuarit e Lulzim Bashës akuzojnë maxhorancën se kanë ndryshuar vullnetin e shumicës së shqiptarëve, pasi ata janë të bindur se qytetarët kërkonin ndryshim.
PD9
Edhe kryedemokrati deri më tani ka këtë bindje, por tashmë ai u ka dhënë një detyrë tjetër drejtuesve politikë në 12 qarqe që në analizën e zgjedhjeve të japin me detaje se kush dhe si ka ndikuar në zgjedhjet e 25 prillit. Dy ditë pas miratimit të udhëzimit për analizën e rezultatit të zgjedhjeve në nivel qarku, dege, seksioni e grupseksioni, gazeta “Panorama” ka siguruar formularin tip të përgatitur nga selia qendrore e PD-së që i është shpërndarë grupit të punës (drejtuesit politik, kryetar dege, sekretar dege) në të 12 qarqet se si do të për- gatitet raporti final i analizës.
SKEMA
Grupi i punës në çdo qark me në krye drejtuesin politik fillimisht duhet të raportojë se cili ka qenë ndikimi i situatës politike në rezultatin final të zgjedhjeve. Kujtojmë që Partia Demokratike së bashku me aleatët e saj të vegjël hyri në këto zgjedhje pa asnjë pushtet, pasi dogji mandatet në vitin 2019 dhe pak muaj më vonë po të atij viti bojkotoi zgjedhjet lokale. Në pikën e dytë të analizës, demokratët duhet të përmendin çdo emër të personave që pretendojnë se kanë ndikuar në mënyra të jashtëligjshme në mënyrën sesi do të votonin qytetarët. Në këtë mënyrë, ata që pretendojnë se në qarkun e tyre është kryer masakër elektorale, do duhet ta vërtetojnë atë me detaje duke përmendur emrin e gjithsecilit që ka ndikuar, por edhe duke e faktuar pretendimin e tyre.
Nëse nuk arrihet një analizë e tillë, nuk përjashtohet mundësia e ndryshimeve në struktura, pasi edhe në udhëzim parashikohej që nëse nevojitet do të ketë zgjedhje në struktura pas analizës. Drejtuesit politikë dhe ekipi i gjithsecilit do duhet të analizojë edhe ndikimin që ka pasur kandidati i çdo partie tjetër nga subjektet e tjera politike apo si të pavarur. Kjo duket se do të krijojë një panoramë më të qartë për kreun e PD- së se cili ka qenë ndikimi i emrave që hynë në Parlament në 2019 nga listat e opozitës por që në zgjedhjet e 2021 morën vota për PS. Po ashtu, përmes kësaj analize, konkretisht në pikën 3, selia blu do të mësojë se sa kanë ndikuar Astrit Patozi, Jozefina Topalli, Myslim Murrizi dhe Rudina Hajdari në pamundësimin e fitores së zgjedhjeve nga PD-Aleanca për Ndryshim. Në fakt, asnjë prej ish-figurave të PD-së që hynë në zgjedhje me partitë e tyre nuk arritën të fitonin mandatin, por mbetet për t’u parë se sa kanë ndikuar për të dëmtuar PD.
ALEATËT
Aleatët e vegjël që patën emrat në listën e Partisë Demokratike dolën nga zgjedhjet me 7 mandate deputetësh. Nga analiza paraprake asnjë nga emrat e aleatëve nuk morën vota preferenciale për të nxjerrë mandatin e deputetit. Por analiza që do bëhet në çdo qark do të jetë edhe më e thellë për të parë kontributin e PR, PAA, PBDNJ,PDIU, LZHK e PDK në rezultatin final. Krahas këtyre analizave, grupi i punës do të përgatisë edhe një tabelë me historikun e rezultatit në çdo strukturë duke nisur që nga zgjedhjet e 2009 e deri më zgjedhjet e fundit të 2021. Për herë të parë në këto zgjedhje, Kodi Zgjedhor sanksionoi që qytetarët, përveç subjekteve politike, të kishin mundësi të votonin edhe kandidatin e tyre të preferuar brenda partisë. Në këto zgjedhje, nga Partia Demokratike ishin shumë të paktë kandidatët që thyen herësin mbi 10 mijë vota. Në fakt, kjo risi ka krijuar edhe pakënaqësi të brendshme. Shumë nga kandidatët apo drejtuesit politikë, sidomos në qarkun e Tiranës, pretendojnë se kolegët e tyre u kanë hyrë në zonën e tyre zgjedhore për të marrë vota preferenciale. Pikërisht për t’i dhënë fund këtij pretendimi, formulari tip i shpërndarë nga PD në një nga pikat e tij përmban edhe këtë fakt.
VAZHDO TË LEXOSH MË TEPËR PËR TEMËN
“Farsa e re e Lulzim Bashës nuk është proçesi juaj”
