Një pjesë e futbollistëve shkëlqyen në Evropian, por kishte nga ata që ishin nën mesataren e tyre. Faqja prestigjoze që merret me statistikat “Whoscored”, bëri një vlerësim të deritanishëm të atij që mund të quhet formacioni i lojtarëve që u paraqitën më dobët në Euro 2020.
Hungaria mori dy barazime në grupin e ferrit, me Francën dhe Gjermaninë, por përfaqësohet në formacionin më të dobët me tre futbollistë, dy qendërmbrojtësit Szalai e Orban, si dhe mesfushori Nego.
Gjermania që u eliminua nga Anglia ka dy futbollistë, portierin Neuer dhe sulmuesin Werner. Për habi, mungon Thomas Muller në këtë formacion, që humbi atë rast të artë në ndeshjen e fundit dhe mund të kishte ndryshuar rrjedhën e këtij Evropiani.
Në formacionin më të dobët ndodhet edhe një shqiptar: Ezgjan Alioski i Maqedonisë së Veriut. Por ka edhe emra të tjerë nga të cilët priteshin shumë, si Rebic i Kroacisë dhe turku Yillmaz. Plotësojnë 11-en më të dobët Williams i Uellsit, Krychowiak i Polonisë dhe Berg i Suedisë, të gjithë të eliminuar.
