Regjisori i njohur Pëllumb Kulla, ka reaguar lidhur me pjesëmarrjen e Goran Bregoviç, në festën e Birrës në Korçë.
Kulla thotë me anë të një postimi në rrjetet sociale, se një konflikt të tillë shqiptaro-shqiptar e duan vetëm ata gjasmenacionlistët e shumtë, votahumburit gojëhidhur që vërsulen në çdo zjarr dhe rreshtohen në anën e mosarsyes.
Regjisori këshillon të gjithë ata që nuk e duan Bregoviçin që ta bojkotojnë dhe të mos i shkojnë në koncert, ndërkohë që vetë konfirmon pjesëmarrjen. Duke u bazuar në ndarjen që është bërë së fundmi, pro dhe kundër ardhjes së tij në Korçë, Kulla e mbyll me një batutë: Hej dreq! Nuk na u ndanë votimet ne, shqiptarëve!
Postimi i plotë:
Është e turpshme kjo polemikë.
Aq sa mua më vjen turp edhe që nuk rri dot pa marrë pjesë, edhe në këtë zhurmërim.
Na tërheqin zvarrë ca njerëz me nevoja më të mëdha se ato muzikoret. Po na zvarritin në këtë terren të mirënjohur shqiptar, për një konflikt të ri shqiptaro-shqiptar.
Për këtë u vu edhe kjo flakë politike. Këtë e duan gjasmenacionalistët e shumtë, votahumburit gojëhidhur, që vërsulen në çdo zjarr dhe rreshtohen në anën e mosarsyes.
Në këto pak rreshta, dua përulësisht të ftoj një zgjidhje për të dy palët.
Nuk di që ai ta meritojë dënimin por, megjithatë, e dënoj artistin bosnjak Goran Bregoviç, edhe sikur atij antishqiptarizmi të mos t’i ketë shkuar nëpër asnjë sekondë. E dënoj duke iu kërkuar atyre që nuk e pëlqejnë, që të mos i shkojnë aspak, ta shohin dhe ta duartrokasin aty në festën e birrës në Korçë. Le ta lenë para mikrofonit me sheshin bosh përpara. Pa këmbë njeriu!
Nga ana tjetër këngëtarin e shquar me atë popullaritet marramendës, e përgëzoj për simpatinë që ka fituar nëpër Ballkan dhe botë dhe uroj që në Korçë, të jetë i rrethuar me sa më shumë admirues. Ftoj të gjithë ata që e pëlqejnë të vrapojnë të shijojnë artin dhe zërin e tij.
Unë do të jem mes tyre!…
Hej dreq! Nuk na u ndanë votimet ne, shqiptarëve!
VAZHDO TË LEXOSH MË TEPËR PËR TEMËN
Koha kur Goran Bregoviç këndonte në shqip
