Vetingu i gjyqtarëve dhe prokurorëve ka nisur me një rast të paprecedent, ku subjekti që po i nënshtrohej procesit ndodhet në qelitë e burgut.
Prokurori i pezulluar i Sarandës, Sali Hasa, nuk ka preferuar të marrë pjesë në seancë, pavarësisht kërkesës fillestare.
Ai do të dilte para anëtarëve të Komisionit me pranga në duar, ndërsa është arrestuar për korrupsion më 19 qershor 2021.
Ndërsa kriteri i pastërtisë së figurës dhe profesionalizmit ka rënë pas këtij arrestimi, prokurori po i nënshtrohet procesit të vetingut vetëm në kriterin e pasurisë. Në relacionin e lexuar nga Roland Ilia, anëtar i trupit gjykues, ka konstatuar deklarime të pasakta të pasurive të vendosura ndër vite, duke fshehur burimet e tyre.
Bëhet fjalë për disa apartamente në pronësi të tij, për të cilat nuk ka burime financiare. Relatori Ilia tha se zyra e hipotekës Kavajë ka konfirmuar se Hasa e ka shitur tokën në vitin 2004, por nuk ka dokumentacion për shitjen e karabinasë me sipërfaqe ndërtimi 130 m2 në shumën 2.5 milionë lekë.
Gjatë seancës, relatori deklaroi se prokurori duket se nuk e ka deklaruar qëllimisht para noterit shitjen e karabinasë. Për këtë arsye, subjekti është në pamundësi financiare për blerjen e një apartamenti në Durrës, i blerë në vitin 2005, i deklaruar në shumën e 1.7 milionë lekëve.
Megjithatë, nga hetimi ka rezultuar se kontrata për porosinë e apartamentit është bërë në vitin 2001 me shumën e 50 mijë dollarëve.
“Vlera e kontratës së shitjes 1.7 milionë lekë dyshohet të jetë fiktive. Subjekti është përpjekur të fshehë të vërtetën e banesës”, tha relatori i çështjes, duke deklaruar se vlera reale e apartamentit ishte 8.9 milionë lekë.
Problematika të ngjashme janë konstatuar edhe për një apartament në pronësi të prokurorit Hasa në Sarandë me një sipërfaqe 90 m2 , i cili ka kushtuar sipas deklarimit 3.9 milionë lekë.
Edhe në këtë rast, apartamenti është blerë me çmim më të ulët se ai i tregut. Problematika janë shfaqur edhe blerja e 5 automjeteve, ku njëri prej tyre ishte blerë 850 euro nga djali i prokurorit dhe ishte shitur për 4 milionë lekë të vjetër.
Një makinë tjetër ishte blerë me një hua prej 1 milion lekësh. Sipas KPK-së, Hasa nuk ka arritur të provojë mundësinë financiare të huadhënësit. Më 3 shtator, KPK pritet të shpallë vendimin ndaj prokurorit Hasa.
Janë rreth 300 gjyqtarë dhe prokurorë që presin t’i nënshtrohen procesit të vetingut, ndërsa atë e kanë kaluar tanimë 421 gjyqtarë e prokurorë, ku vetëm 171 prej tyre janë konfirmuar në detyrë.
VAZHDO TË LEXOSH MË TEPËR PËR TEMËN
