Shkon në dy numri i të arrestuarve për vrasjen e biznesmenit Ruzhdi Hoxha. Policia e Tiranës ka arrestuar vëllanë e autorit të dyshuar të krimit, Pajtim Rrushi 42-vjeç. Organet hetimore dyshojnë se Fredi Rrushin, që u arrestua në 26 Tetor e ka ndihmuar vëllai në krim.
Po sipas policisë, Rrushi dyshohet dhe si porositësi dhe organizatori i kultivimit të bimëve narkotike në fshatin Ballenj në parcelën që u zbulua në 31 Tetor gjatë kontrolleve për biznesmenin dhe nga ku u arrestuan A. D dhe G. K.
Pajtim Rrushi akuzohet për veprat penale “Veprime që pengojnë zbulimin e të vërtetës” dhe “ Fshehje ose asgjësim i kufomës“, i dyshuar si bashkëpunëtor në “varrosjen” e trupit të biznesmenit në zonën e Dajtit. Ndërkohë që Fredi Rrushit i është komunikuar në burg akuza për vrasje, kultivim droge dhe fshehje e kufomës.
Por si arriti policia të gjejë vendin ku u vra e u hodh biznesmeni 43 vjeçar?
Pak ditë më parë, pranë shkollës së bashkuar gjetën celularin e thyer të Hoxhës. Kjo provë bëri që hetuesit të këqyrnin kamerat e sigurisë përgjatë zonës. Ato kishin fiksuar lëvizjen e Fredi Rrushit drejt Dajtit me mjetin “Passat”. Pak kërkimeve dy ditore me qen, në Qafë Mollë fillimisht u zbulua xhupi me njolla gjaku, e më pas trupi i pajetë i biznesmenit.
Grupi hetimor tashmë ka të qartë edhe itinerarin që Rrushi ka ndjekur nga zona e “3-shit” drejt Dajtit. Fillimisht, ai kishte telefonuar mikun e tij Ruzhdi Hoxhën 4 herë pasditen e 20 tetorit, por ky i fundit nuk i ishte përgjigjur. Më pas kishte marrë një prej personave që ndodhej në tavolinë me Hoxhën. Rreth orës 23:00, Fredi Rrushi kishte shkuar ta merrte atë me makinë.
Aty ndodheshin edhe dy persona të tjerë të cilët zbritën nga mjeti. Dy miqtë, Rrushi e Hoxha vazhduan rrugën drejt Dajtit. Pasi kishte kryer krimin, autori i dyshuar ka zbritur nga Qafa e Mollës në orën 3 të mëngjesit, ku kishte hedhur edhe celularin e Hoxhës përgjatë rrugës. Si pistë kryesore të vrasjes, policia ka konfliktet e borxhit dhe parcelat me kanabis.
VAZHDO TË LEXOSH MË TEPËR PËR TEMËN
