Piloti italian i Ducati, Francesco Bagnaia, fitoi sot garën e Çmimit të Madh të Valencia në Moto GP, gara e fundit sezonale. Një sukses më së shumti për statistikë për Bagnaia, pasi titulli kampion është vendosur kohë më parë. Ai është fituar nga francezi i Yamaha, Fabio Quartararo, që sot u klasifikua në vendin e pestë.
Në podium u ngjitën edhe spanjolli Jorge Martin me Ducati Pramac (e nisi garën nga “pole”), ndërsa i treti u rendit australiani Jack Miller me motorin tjetër zyrtar të Ducati. Për sa i përket garës. Ajo u vendos në mesin e saj, kur Bagnaia parakaloi Martin dhe më pas e ruajti kreun deri në fund, duke e merituar fitoren.
Vëmendja në garën e sotme ishte te një tjetër pilot italian, Valentino Rossi me Yamaha Petronas (i dhjeti sot). Legjenda e Moto GP zhvilloi sot garën e tij të fundit në karrierë, pasi ka vendosur të tërhiqet nga ky sport, ku ka fituar 9 tituj kampionë. Emocionet e kësaj gare ishin të mëdha për Rossi, që u përshëndet nga fansat e shumtë e kolegët e tij pas garës.
For the victories, for the rivalries, for the inspiration, for the laughs, for the celebrations, for the showbiz…
Thank you @ValeYellow46 💛#GrazieVale #ValenciaGP 🏁 pic.twitter.com/Wxl23g4U6S
— MotoGP™🏁 (@MotoGP) November 14, 2021
Doktori u prit me ovacione pasi kaloi vijën e finishit. Rossi e kishte paralajmëruar që kjo do të ishte gara e tij e fundit në karrierën e tij jubilare. Shumë personazhe të famshëm i dedikuan nga një urim italianit, ku nuk mungoi edhe braziliani Ronaldo, i pranishëm në Valencia sot.
Valentino Rossi është padyshim legjendë e Moto GP. Karriera e tij ka frymëzuar shumë pilotë të rinj dhe i ka sjellë një popullaritet mjaft të madh këtij sporti. Italiani ka marrë pjesë në 370 gara përgjatë karrierës së tij. Ai ka fituar 89 dhe ka qenë në podium 199 herë.
A #ValenciaGP we will remember for a long long time! 🙌
Check out how the last #MotoGP race of 2021 unfolded in Valencia 👀#ValenciaGP 🏁 | #GrazieVale https://t.co/ibzXgcWAJJ
— MotoGP™🏁 (@MotoGP) November 14, 2021
