Nëntë serbë, ish-anëtarë të Ushtrisë së Republikës Serbe, u arrestuan sot në Bosnje-Hercegovinë me dyshimin se kanë kryer krime lufte.
Dyshohet se ata kanë kryer një krim kundër pjesëtarëve të kombësisë boshnjake dhe kroate në vitin 1992 në zonën e Bosanski Novi.
Sipas Agjencisë Shtetërore të Hetimit dhe Mbrojtjes (SIPA), të gjithë të arrestuarit jetojnë ende në zonën e Bosanski Novi gjersa akuzohen për krime kundër njerëzimit, raportojnë mediat e huaja.
Të dyshuarit janë arrestuar për kryerjen e disa vrasjeve dhe arrestimeve të paligjshme. Gjithashtu ata dyshohet se kanë kryer krime ndaj disa qindra personave në kampin e “Shtëpisë së Zjarrit”, i cili menaxhohej nga policia ushtarake.
Edhe drejtuesit e ushtrisë serbe në Bosnjë, Ratko Mlladiq (gjeneral i ushtrisë), Radovan Karaxhiq (ish-president i Republikës Serbe) dhe Sllobodan Milosheviq (ish-president i ish-Jugosllavisë) janë arrestuar më parë me akuzat për krime lufte në ish-Jugosllavi.
