Shtetet e Bashkuara të Amerikës ka vendosur sanksione ndaj një grupi të krimit të organizuar që vepron në veri të Kosovës, në krye të së cilit është Zvonko Veselinoviç.
Sipas njoftimit të Zyrës së Kontrollit për Pasuritë e Huaja të Departamentit të Thesarit, përveç Veselinoviç janë edhe i vëllai Zharko Veselinoviç, pastaj Zhelko Bojiç, Milan Mihajloviç, Sinisha Nedeljkoviç, Radovan Radiç, Milan Radisavleviç, Milojko Radisavleviç, Milan Radojçiç, Marko Rosiç, Radule Steviç, Milivoje Vuloviç.
Ky grup, sipas Departamentit të Thesarit i ka të regjistruara 11 biznese në Kosovë, 10 në Serbi, nga një në Kroaci dhe Bullgari.
Nga të dhënat e Agjencisë për Regjistrimin e Bizneseve të Kosovës (ARBK), shumica e bizneseve si agjent të autorizuar kanë Zvonko Veselinoviçin.
S. Z. T. R. Prizma B. I. si biznes është regjistruar në vitin 2010 në Graçanicë me përfaqësues të autorizuar Aleksandar Trajkoviç, ku si aktivitet primar ka riparimin e artikujve personal dhe shtëpiakë.
Kompania Ferari Preduzece za Usluge i Promet Polovnim Vozilima SH. A. është në pronësi të Zvonko Veselinoviçit, ku si aktivitet kryesor ka tregtinë me pakicë të mallrave të përdorura në dyqane, ku është themeluar në vitin 2002 në Mitrovicë.
Vëllai i Veselinoviçit, Zharko ka në posedim biznesin S. T. R. Kristal që është regjistruar në vitin 2005 me seli në Mitrovicë që si aktivitet ka formësimin dhe përpunimin e qelqit të rrafshët.
Në pronësi të Radule Steviç janë dy kompani. P. T. P. Rad si aktivitet primar ka ndërtimin e objekteve banesore dhe jobanesore, e themeluar në vitin 2013 në Zveçan. Ndërsa, biznesi Rad D. O. O. ka të njëjtin aktivitet dhe adresë si kompania e parë, por që është themeluar në vitin 2018.
Sinisha Nedeljkoviç ka në pronësi katër biznese. P. T. P. Metal në ARBK është e regjistruar që nga viti 2001 me seli në Zveçan, ku si punë kryesore ka tregtinë me pakicë të artikujve elektronikë, ngjyrave dhe xhamit, në dyqane të specializuara, si nën kompani zotëron P. P. Robna Kuca Metal B. I., ndërsa Robna Kuca Metal D. O. O. vepron po ashtu në Zveçan, ku është regjistruar në vitin 2017 më aktivitet kryesor tregtinë me shumicë të pajisjeve elektroshtëpiake. Biznesi i katërt që zotëron Nedeljkoviç është Sinisa Nedeljkoviç B. I. e regjistruar në Shtërpcë në vitin 2015 më aktivitet shërbimin e pijeve.
Pjesëmarrësi tjetër i grupit kriminal të Veselinoviçit, Miljan Radisavljeviç ka në pronësi kompaninë P. P. Babudovac B. I. që është e regjistruar në vitin 2004 në Zubin Potok, me aktivitet primar tregtinë me shumicë të drithërave, duhanit të papërpunuar, farërave dhe ushqimit të kafshëve.
Ndërsa, Radovan Radiç ka në pronësi kompaninë Radovan Radic B. I. e regjistruar në vitin 2014 në Zubin Potok, e cila merret me përgatitjen e vendpunishteve.
Departamenti amerikan i Thesarit thotë se ky grup ka qenë i përfshirë në skema të mëdha të ryshfetit me zyrtarë të sigurisë, kosovarë dhe serbë, të cilët lehtësojnë trafikimin e paligjshëm të mallrave, parave, narkotikëve dhe armëve midis dy vendeve.
