Bisedime të rëndësishme me Rusinë do të kërkohen nga NATO në fillim të vitit të ardhshëm, tha Sekretari i Përgjithshëm i Aleancës, Jens Stoltenberg.
“Ne jemi gati për një dialog kuptimplotë me Rusinë dhe kam ndërmend të thërras një takim të ri të Këshillit NATO-Rusi sa më shpejt të jetë e mundur në vitin e ri ,” tha Stoltenberg në një konferencë për shtyp në Bruksel.
Qëllimi i NATO -s është të trajtojë tensionet ndërsa dhjetëra mijëra trupa ruse përforcojnë kufirin me Ukrainën.
Këshilli NATO-Rusi (NRC) u krijua në 2002 për të lehtësuar konsultimet midis aleancës ushtarake perëndimore dhe Moskës. Megjithatë, marrëdhëniet mes dy palëve janë të tensionuara dhe thirrja e fundit e saj ishte në korrik 2019, pavarësisht thirrjeve të përsëritura të NATO-s për të ringjallur këtë strukturë.
Të premten, Rusia paraqiti një listë kërkesash, duke përfshirë atë që NATO të mos e pranojë ish-republikën sovjetike si anëtare dhe të garantojë se nuk do të vendosen armë apo ushtarë atje.
Presidenti rus Vladimir Putin shprehu sot shpresën për bisedime konstruktive me Uashingtonin dhe Brukselin mbi kërkesat e Rusisë për garancitë e sigurisë pasi ka shenja se Perëndimi është gati të punojë për këtë çështje.
Stoltenberg e bëri të qartë, megjithatë, se i takonte NATO-s dhe Ukrainës të vendosnin për anëtarësimin e ardhshëm të Kievit në Aleancë.
“Çdo dialog me Rusinë duhet, natyrisht, të respektojë parimet bazë mbi të cilat është ndërtuar siguria evropiane, ” tha ai, duke shtuar se NATO do të konsultohet me Kievin për bisedimet e mundshme me Moskën.
“Kështu që ne kurrë nuk do të bëjmë kompromis me të drejtën tonë për të mbrojtur të gjithë aleatët dhe nuk do të bëjmë kurrë kompromis për të drejtën e çdo vendi në Evropë, përfshirë Ukrainën, për të zgjedhur rrugën e vet,” tha ai.
