Katër persona kanë rënë në prangat e Policisë së Dibrës pasi janë përfshirë në një sulm me armë të ndodhur dy muaj më parë në aksin rrugor Bulqizë-Fushë Bulqizë. Të arrestuarit kanë qenë në konflikt pronësie kanë hapur zjarr ndaj njëri-tjetrit. Ngjarja ka ndodhur në 20 nëntor 2020.
Specialistët e Seksionit për Hetimin e Krimeve Kundër Personit në Drejtorinë Vendore të Policisë Dibër në bashkëpunim me Komisariatin e Policisë Bulqizë, nën drejtimin e Prokurorisë Dibër, finalizuan me sukses operacioni policor të koduar “Liqeni i Zi”, si rezultat i të cilit u bë ekzekutimi i masave të sigurisë dhe arrestimi i shtetasve:
- Sh. T., 53 vjeç, banues në Bulqizë, (me masë sigurie arrest në burg)
- E. T., 25 vjeç, banues në Bulqizë, (me masë sigurie arrest në burg)
- A. A., 34 vjeç, banues në Tiranë, (me mase sigurie arrest në burg , aktualisht ndodhet i ndaluar për një tjetër vepër penale në burgun 313 Tiranë).
- L. L., 29 vjeç, banues në Bulqizë, (me masë sigurie arrest në shtëpi).
Nga tërësia e veprimeve hetimore të kryera, informacionet e marra në rrugë operative dhe provave ligjore (shkencore) të siguruara, është arritur të dokumentohet ngjarja e ndodhur në datën 20 nëntor 2020, në aksin rrugor Bulqizë-Fushë Bulqizë , ku për shkak të një konflikti të mëparshëm për motive pronësie, shtetasit Sh. T. dhe E. T., duke udhëtuar me automjetin e tyre, kanë qëlluar me armë zjarri në drejtim të automjetit që udhëtonin shtetasit B. S.(Z), dhe A. A., të cilët u janë kundërpërgjigjur duke qëlluar me armë zjarri.
Nga hetimet e kryera ka rezultuar se në këtë ngjarje është përfshirë dhe shtetasi L. L., i cili ka kryer veprime për të penguar zbulimin e së vërtetës.
Prokuroria Pranë Gjykatës së Shkallës së Parë Dibër ka urdhëruar ekzekutimin e vendimit penal të Gjykatës së Shkallës së Parë Dibër e cila ka caktuar masat e sigurimit të arrestit për këto shtetas si të dyshuar për veprat penale të “Vrasjes me paramendim”, e kryer në bashkëpunim, e mbetur në tentativë, “ Mbatje pa leje dhe prodhim i armëve, armëve shpërthyese dhe i municionit”, “Veprime që pengojnë zbulimin e së vërtetës”.
Materialet procedurale i kaluan Prokurorisë për veprime të mëtejshme.
