Çmimet e naftës u rritën të hënën pas ditëve të mungesës së furnizimit në Kazakistan dhe Libi.
Standardi global i naftës së papërpunuar Brent fitoi 35 cent, ose 0.4%, duke u rritur në 82.1 dollarë për fuçi në orën 08:00 GMT. Standardi amerikan West Texas Intermediate u rrit gjithashtu me 37 cent, ose 0.5%, duke u këmbyer me 79.27 dollarë për fuçi.
Në përgjithësi, çmimet e naftës u rritën me 5% javën e kaluar pas protestave në Kazakistan, të cilat ndërprenë linjat e trenave dhe shkaktuan një rënie të prodhimit në fushën kryesore të naftës të vendit, Tengiz. Sipas një shënimi për Reuters nga Chevron, Tengizchevroil i Kazakistanit (TCO) aktualisht po merr hapa për të shtyrë prodhimin në nivele normale atje.
Mirëmbajtja e tubacioneve në Libi ndikoi gjithashtu çmimet globale, pasi prodhimi atje ra në 729,000 fuçi në ditë (bpd) nga niveli më i lartë i vitit të kaluar prej 1.3 milion bpd, duke rënë mbi 40%.
Përveç çështjeve të furnizimit, çmimet e naftës ndikohen gjithashtu nga rritja e kërkesës globale dhe ajo që disa e konsiderojnë rritje të vogla të prodhimit nga Organizata e Vendeve Eksportuese të Naftës dhe aleatët e saj, ose OPEC+.
Grupi, megjithatë, pret një mbiofertë në tregun e naftës këtë vit dhe ka mbajtur shtesat e ofertës për janarin në nivelin e rënë dakord verën e kaluar. Në korrik, OPEC+ vendosi të rrisë gradualisht prodhimin me 400,000 fuçi në ditë çdo muaj për të rikthyer prodhimin, i cili ishte shkurtuar në vitin 2020 pas një rënieje të kërkesës pasi bllokimet e Covid-19 goditën udhëtimet dhe aktivitetin ekonomik.
/Përkthyer dhe përshtatur për Konica.al nga RT
