Forca të shumta të Policisë së Shtetit dhe asaj Bashkiake kanë shkuar mëngjesin e sotëm në zonën e 5 Majit në Tiranë, ku pritet IMT të vijojë me shembjen e banesave të tjera.
Prej kohësh, banorët atje kundërshtojnë prishjen e shtëpive edhe pse rreth dy javë më parë u shembën nga IMT banesat e para dhe u hasën me kundërshtime dhe përplasje të shumta nga qytetarët.
Banorëve të “5 Majit” në njësinë numër 4 do tu shemben sot banesat. Ata edhe mbrëmë kanë pritur jashtë IMT, ndërsa në mbështetje të njësisë 4 kanë shkuar edhe ata qytetarë të njësisë 8.
Bashkia e Tiranës më parë ka sqaruar se pjesa e banorëve që preken nga projekti i lagjes së re po nënshkruajnë kontratat me Bashkinë e Tiranës. VKM e miratuar në shtator 2021, thotë shprehimisht se këta banorë kompensohen 100% me shtëpi në pallatet e reja, me të njëjtën sipërfaqe në metra katrorë të banesës që zotërojnë aktualisht.
Në bazë të vendimit të miratuar nga qeveria, edhe ata banorë që kanë ndërtuar pa leje dhe që janë në proces legalizimi, do të përfitojnë të njëjtën sipërfaqe banimi në metra katrorë, në godinat e reja që po ngrihen në të njëjtën zonë, shkruan neësbomb.al.
Bashkia e Tiranës ka marrë përsipër që t’u paguajë qiranë e shtëpisë të gjitha familjeve që preken nga projekti, derisa ata të marrin në dorë çelësat e banesave të reja.
