Nga Mero Baze
Klani “Osmani” ishte financuesi kryesor dhe garanti financiar i gjithë fushatës elektorale të Partisë Demokratike më 2005. Ata financuan pagesën nën dorë për një kompani lobimi amerikane si dhe më pas mbështetën gjithë shpenzimet personale të Seli Berishës, për tu shpërblyer pas fitores me marrjen nën kontroll të lojërave të fatit në Shqipëri.
Në Janar të vitit 2005 Partia Demokratike nënshkroi në Uashington një marrëveshje me shoqërinë BG&R për mbështetje në fushatën elektorale të vitit 2005. Ndërsa dilte nga zyrat e BG&R, ku Berisha sapo kishte firmosur kontratën, ishte shqetësuar dhe i çuditur, pse “këta” i donin 500 mijë me bankë dhe pjesën tjetër në cash. Në kontratën formale të nënshkruar pagesa do të ishte 500 mijë dollarë e ndarë nga 20 mijë dollarë për 25 muaj. Por jashtë kontratës do të paguheshin 1 milionë dollarë të tjerë. Damir Fazlici që na printe në korridorin e ndërtesës dukej i lumtur dhe po i jepte zemër Berishës se gjithçka do shkonte mirë.
Dhe Sali Berisha e kishte një zgjidhje në mendjen e vet.Për të siguruar pagesën formale, Sali Berisha organizoi një justifikim fondesh nga 25 degë të Partisë Demokratike të cilat gjoja do të grumbullonin nga 20 mijë dollarë. Operacioni ishte fals.
Më tej Damir Fazlic i cili ishte ndërmjetësi me BG&R tha se duhet të merrte pagesën formale prej 1 milion dollarësh në Tetovë. Paret u kaluan ilegalisht në kufirin shqiptaro maqedonas dhe dorëzimi i tyre u bë në Tetovë.
Lidhjet e Sali Berishës me familjen Osmani ishin më të herëshme. Në vitin 2002, mbesa e dytë e Sali Berishës pati nevojë për një ndërhyrje mjekësore të shtrenjte në Gjermani dhe ajo u mundësua në Hamburg aty ku vepron familja Osmani. Më pas lidhjet e tyre u forcuan dhe ata u bën garantët financiarë të fushatës elektorale të vitit 2005.
Pas fitores së Partisë Demokratike lojërat e fatit u futën tërësisht nën kontrollin e këtij klani. Ata ishin shitësit kryesor ta makinave të lojërave të fatit për kazinotë e lagjeve që u hapën në çdo cep rruge ndërsa një rrejt i gjerë lojërash të fatit nën kujdestarin direkt të djalit të Sali Berishës funksiononte jashtë vëmendjes fiskale të shtetit dhe sot janë njerëzit më të rëndësishëm të Klanit Osmani në Tiranë.
I njëjti klan kishte lidhje me një ministër të afërt me familjen e Rugovës në Prishtinë, të cilët po ashtu u përfshinë në biznese të përbashkëta me lojërat e fatit në Shqipëri.
Shkëlzen Berisha u bë njeri familjar i Klanit Osmani. Ai ishte jo vetëm i ftuari i tyre i përhershëm në Evropë por dhe mysafir tek shtëpia e tyre në Gjakovë gjatë një fatkeqësie ku shkoi për ngushëllime, çka tregon lidhjen e afërt personale me ta.
Lidhjet e reja që po dalin dhe me sekserë të tokave në bregdetin e Vlorës, e forcojnë dhe më shumë përfshirjen e Shkëlzen Berishës në bizneset e këtij grupi.
Tani që ky grup është shpallur në kërkim ndërkombëtar dhe është vendosur nën sekuestro SPAK e ka për detyrë të hetoj gjithë partnerët e tyre në Shqipëri, njerëzit që kanë përfaqësuar bizneset e lojërave të fatit të lidhur me ta dhe natyrisht Shkëlzen Berishën. Kjo nuk është e gjitha çfarë ai ka bërë gjatë pushtetit të babait, por gjithçka që ka bërë Klani Osmani në Shqipëri e ka bërë nën pushtetin e babait të tij.
VAZHDO TË LEXOSH MË TEPËR PËR TEMËN
Basha-Berisha, nga përplasja vijnë në përplasje shkojnë
Ja ka marrë apo jo partinë Lulit?!
