Alain Giresse ka debutuar në mënyrën më të mirë të mundshme në krye të përfaqësueses së Kosovës, duke fituar 5-0 në Prishtinë në miqësoren kundër Burkina Faso. Një nisje shumë e mirë për trajnerin francez.
Dardanët e nisën shumë mirë, teksa realizuan që në minutën e tretë me Fidan Alitin. Më pas ishte Astrit Selmani që dyfishoi shifrat në minutën e 23-të. Kaq mjaftoi për pjesën e parë.
Në të dytën është Mërgim Vojvoda që shënon golin e tretë për Kosovën në minutën e 55-të, pas pasimit të Rashicës. Në 65’, është portieri Ujkani që u mohon miqve afrikanë një gol, teksa pret penalltinë. Pas 3 minuyash vendasit shënojnë golin e katërt, teksa është vetë Rashica që shënon.
Në të 75’ ka vend edhe për Tomi Domgjonin, që shënon golin e pestë dhe të fundit të kësaj ndeshje. Një fitore që rikthen entuziazmin në përfaqësuesen dardane, që më 29 mars do të luajë miqësoren tjetër, atë me Zvicrën në transfertë.
VAZHDO TË LEXOSH MË TEPËR PËR TEMËN
