Një gjyshe e mbështjellë me një xhaketë për t’u mbrojtur nga i ftohti qëndron duke qarë para shtëpisë së saj prej druri, e cila është djegur nga një raketë që godti fshatin e saj. Video prekëse është taman si fotot që publiku perëndimor po sheh përmes ekranit nga lufta në Ukrainë.
Por me një ndryshim. Në këtë rast ky është kanali televiziv rus i kontrolluar nga qeveria, Rossiya24 dhe sipas tij ushtarët që sulmojnë fshatin e saj janë ukrainas dhe jo rusë.
Korrespondenti rus i quan ata “nacionalistë”. Raportime të tjera në kanal i quajnë ata “neo-nazistë”, “fashistë” ose “narkomanë” që përdorin civilët si “mburoja njerëzore”.
Pothuajse të gjitha raportimet për konfliktin janë nga rajoni separatist i Donbasit në lindje të Ukrainës, veçanërisht nga Donetsk dhe Luhansk, kryesisht entitete rusisht-folëse që Rusia i njohu si shtete të pavarura më 21 shkurt.
Ky ishte shkaku për pushtimin e Ukrainës nga Rusia, duke i dhënë Moskës pretekstin për të pushtuar, duke pretenduar se nuk kishte zgjidhje tjetër veçse t’i “mbronte” ata nga sulmi nga Ukraina, një akuzë që Ukraina e mohon fuqishëm.
Në transmetimet ruse, lufta në pjesën tjetër të Ukrainës, lufta që shumica e njerëzve në mbarë botën po dëshmojnë, është injoruar kryesisht, rrënojat e Mariupolit të mbetura pas bombardimeve ruse; skelat e djegura të shtëpive dhe ndërtesave në Kharkiv, Chernihiv, Kherson, Zhytomyr dhe qytete të tjera të shkatërruara nga sulmet ajrore ruse; lagjet e banuara në kryeqytetin Kiev, së bashku me banorët e tyre të tronditur dhe të gjakosur që ikin nga granatimet ruse, pothuajse asnjë nga këto nuk shfaqet në TV rus. Në rast se transmetohet, fajësohe forcat ukrainase.
CNN shkruan se raportimet janë emocionale, shpesh të mbushura me akuza dhe kërcënime të zemëruara. Në një nga emisionet më të njohura të bisedave ruse, drejtuesi, Vladimir Solovyov, kundërshton Evropën dhe Shtetet e Bashkuara, në një moment duke ironizuar raportimet e mediave amerikane se presidenti rus Vladimir Putin, nuk është duke u informuar nga ndihmësit e tij për atë që në të vërtetë po ndodh në Ukrainë.
VAZHDO TË LEXOSH MË TEPËR PËR TEMËN
