“Fati i Ukrainës dhe fati i Bjellorusisë janë të ndërlidhura”, thotë Svetlana Tikhanovskaya, liderja e opozitës, fitorja e së cilës në zgjedhjet e vitit 2020 në Bjellorusi iu vodh nga i forti Alexander Lukashenko.
Ajo ka kaq të drejtë. Lukashenko është bërë tani një vasal i presidentit rus Vladimir Putin, duke lejuar trupat ruse të përdorin Bjellorusinë si pikënisje për luftën kundër Ukrainës.
Demokracia, si në Bjellorusi ashtu edhe në Ukrainë, duhet të shpëtohet nga shkelja nga çizmet e rënda të Putinit dhe Lukashenkos.
Teksa qytetarët dhe ushtria e Ukrainës janë në një betejë ekzistenciale për mbijetesë, Tikhanovskaya na kujtoi javën e kaluar se populli i Bjellorusisë, megjithëse nuk është në luftë, është në një luftë po aq të rëndësishme për të rrëauar diktaturën e Lukashenkos.
Partizanët bjellorusë kanë sabotuar dërgesën e materialit rus të luftës në Ukrainë.
Gjoba të mëdha dhe dënime me burg janë vendosur për ata që protestojnë në Bjellorusi, duke përfshirë gazetarë, drejtues të sindikatave, studentë, profesorë dhe të tjerë.
Kanalet në Telegram, platforma e mediave sociale që ka rezultuar kritike për lëvizjen e demokracisë në Bjellorusi, janë kriminalizuar si “ekstremiste” dhe “terroriste” nga qeveria, duke vendosur ndëshkime për përdoruesit që postojnë në to.
Dhoma e ulët e parlamentit miratoi legjislacionin javën e kaluar që kërkon dënim me vdekje për tentativat e “terrorizmit”. Sipas grupit të të drejtave të njeriut Viasna, ka 1,166 të burgosur politikë të mbajtur nga qeveria e Lukashenkos, duke përfshirë burrin e zonjës Tikhanovskaya, Sergei, dhe një nga kandidatet e saj, Maria Kolesnikova.
Nën presion të madh, demonstratat në rrugë që shpërthyen pas zgjedhjeve të vjedhura të 2020-ës janë shpërndarë, por një opozitë e brendshme vazhdon dhe Shtetet e Bashkuara duhet të vazhdojnë ta mbështesin atë.
Sanksionet evropiane dhe të SHBA-së ndaj qeverisë së Lukashenko; duhet të shtrëngohen me të njëjtën forcë si ato në qeverinë e Putin. Duhet të merren parasysh sanksionet mbi eksportet e çelikut, së bashku me kufizimet ndaj të gjitha bankave shtetërore, produkteve të naftës dhe ngrirjes së rezervave të valutës së huaj të Bjellorusisë.
Rusia hodhi raketa në drejtim të Ukrainës nga Bjellorusia, nisi avionët e komandës dhe kontrollit nga atje dhe ende ka mijëra trupa në Bjellorusi.
Lukashenko është bashkëpunëtor i luftës së zotit Putin dhe duhet të përfundojë në radhët e të akuzuarve me të si kriminel lufte.
Fakti që gjërat mund të shkojnënë atë mënyrë e ka bërë Lukashenko të mos ndihet rehat dhe qeveria e tij është përpjekur t’i qetësojë gjërat me Evropën.
“Ne refuzojmë kategorikisht çdo supozim se Bjellorusia është përfshirë disi në armiqësitë në Ukrainë”, shkroi ministri i jashtëm Vladimir Makei më 6 prill në një letër drejtuar disa homologëve në Bashkimin Evropian.
Tikhanovskya na tha se Lukashenko “do të ndryshojë nga zjarrvënës në zjarrfikës”. Ai nuk mund t’i shmanget përgjegjësisë.
Ukraina po lufton për të ardhmen e saj si një demokraci, por ka gjithashtu një luftë për liri në Bjellorusi dhe Rusi.
Udhëheqës të tillë si Tikhanovskaya, presidenti Volodymyr Zelensky i Ukrainës dhe figurat e opozitës si Alexei Navalny dhe Vladimir Kara-Murza në Rusi na japin arsye të shpresojmë se demokracia do të fitojë.
Ata meritojnë mbështetjen e botës.
Burimi: The Washington Post
Përktheu dhe përshtati: Konica.al
VAZHDO TË LEXOSH MË TEPËR PËR TEMËN
“Rusia nuk po e pushton Ukrainën”
37 vende: Rusia e Bjellorusia të përjashtohen nga çdo event
BE do të fusë Ukrainën në rrjetin e saj të energjisë
