E keni pyetur ndonjëherë veten se çfarë do të thotë të jesh i shëndetshëm mendërisht? Ndonëse diskutimet lidhur me këtë mund të jenë të shumta, ka disa karakteristika të përbashkëta të njerëzve që janë në gjendje të ruajnë një shëndet të mirë mendor. 10 prej tyre i gjeni më poshtë. A identifikoheni me to?
10. Ju zgjoheni çdo ditë dhe ndiheni mirënjohës për diçka.
Kur keni kaluar një ditë ose një javë të keqe, shihni përreth për të parë gjërat që ju sjellin lumturi. Mund të jetë e vështirë, në kohë vuajtjesh, të pranosh gjërat që vlerëson. Por aftësia për të menduar të paktën një gjë për të cilën jeni mirënjohës çdo ditë është një shenjë elasticiteti. Është një shenjë se jeni të shtyrë të vlerësoni gjërat e mira ose marrëdhëniet e mira që keni. Pranimi i këtyre mund të përmirësojë shëndetin tuaj mendor nëse ky është një zakon i rregullt.
9. Keni diçka që prisni ta bëni ose ta përjetoni.
Ndoshta po afron një event me miqtë, një pushim ose diçka aq e thjeshtë sa një natë e qetë në shtëpi duke parë një film të preferuar. Planifikimi i diçkaje, për të cilën prisni me padurim dhe gjetja e njëfarë kënaqësie në të është një shenjë se po kërkoni përvoja pozitive, të cilat mund të ulin ankthin dhe ndjenjat e depresionit.
8. E lëshoni zemërimin dhe nuk kaloni kohë duke mbajtur mëri ndaj njerëzve që ju kanë lënduar.
Ndërsa ne të gjithë kemi pasur marrëdhënie dhe konflikte të vështira në një moment të caktuar, mbajtja e tyre “me vete” mund të na pengojë të vazhdojmë me jetën. Mund të çojë në emocione të brendshme negative, të tilla si zemërimi, trishtimi dhe madje edhe vetmia, që na pengon të gjejmë miqësi ose të krijojmë marrëdhënie të tjera. Nëse mund ta lini me sukses zemërimin dhe të ndaloni së menduari për ata që ju kanë lënduar, ka më shumë gjasa të keni paqe në jetën tuaj dhe të arrini një shëndet të mirë mendor.
7. Ju shijoni gjërat e thjeshta në jetë.
Njerëzit që priren të ruajnë një shëndet të mirë mendor mund të kenë përvoja pozitive duke bërë gjëra të thjeshta, si për shembull ecje në natyrë, të qeshura me miqtë dhe të dashurit ose të dëgjuarit muzikë të mirë.
6. Vazhdoni të përpiqeni dhe kur gjërat bëhen të vështira.
Është e vështirë të qëndroni të motivuar kur jeni duke kaluar nëpër rrethana të vështira. Mund të filloni t’ju mbarojë energjia dhe të humbni shpresën. Por njerëzit që janë mendërisht të shëndetshëm në përgjithësi mund të vazhdojnë kur situata bëhet e vështirë, dhe ndonjëherë kjo i bën ata edhe më këmbëngulës.
5. Ju ndihmoni të tjerët rreth jush.
Njerëzit më të shëndetshëm mendor dhe më elastik nuk janë të fokusuar vetëm te vetja. Edhe kur rrethanat janë të dyshimta, ju vazhdoni të ofroni mbështetje sa më shumë që mundeni. Në varësi të asaj që po ndodh në jetën tuaj, ju mund të mos jeni në gjendje të bëni gjëra të mëdha për të tjerët, por gjithsesi, përpiqeni t’u jepni një dorë njerëzve që kanë vërtet nevojë.
4. Kujdeseni për veten.
Njerëzit e shëndetshëm mendërisht kujdesen për të tjerët, por jo në atë masë sa të mos kujdesen për veten. Ju siguroheni që nevojat tuaja të plotësohen sepse e dini se kjo ju lejon të jeni më të disponueshëm për të ndihmuar të tjerët dhe për të qenë të pranishëm në marrëdhëniet që krijoni me të tjerët.
3. Ju keni kufij të mirëpërcaktuar në marrëdhëniet tuaja.
Të dish kur të thuash jo dhe të dish kur t’i japësh vetes pak hapësirë, u lejon njerëzve që janë mendërisht të shëndetshëm të qëndrojnë në atë mënyrë.
2. Nuk keni zili për atë që kanë të tjerët.
Ju nuk shpenzoni kohë duke e krahasuar veten me të tjerët ose me atë që kanë të tjerët. Ju përqendroheni në atë që dëshironi dhe atë që është brenda mundësive tuaja.
1. Mund të jeni të lumtur për të tjerët, edhe kur vetë jeta juaj duket sfiduese.
Aftësia për të qenë të lumtur për të tjerët dhe për t’i bërë të ditur se jeni të lumtur për ta, është një aspekt i rëndësishëm i shëndetit mendor. Do të thotë që ju mund të shikoni përtej luftës ose dhimbjes suaj dhe jeni të lumtur për të tjerët, pavarësisht se çfarë po ndodh në jetën tuaj.
Disa nga këto karakteristika mund të duken të vështira për t’u arritur. Disa prej nesh janë rritur në familje ku negativiteti, konflikti dhe frika janë një pjesë e vazhdueshme e jetës. Nuk është gjithmonë e lehtë të shkundësh ato cikle dhe të fillojmë zakonet tona të reja. Të mësojmë të riformulojmë të menduarit tonë dhe të jemi të pranishëm për të shijuar atë që na rrethon – janë aftësi të shkëlqyera për t’u fituar ndërsa përpiqemi për shëndet më të mirë mendor.
Burimi: Psychology Today
VAZHDO TË LEXOSH MË TEPËR PËR TEMËN
A është depresioni ngjitës?
10 këshilla inteligjente për ta filluar ditën mbarë
