Mbi 50 mijë ushtarë të NATOS. Bashkë me ta edhe administrata e përkohshme e Kombeve të Bashkuara, do të vendoseshin në Kosovë, 23 vjet më parë .
Më 12 qershor të vitit 1999, pas 78 ditë bombardimesh të Aleancës Ushtarake Perëndimore të udhëhequr nga Amerika, kundër caqeve ushtarake serbo-malazeze në Kosovë në Serbi dhe Mal të Zi, trupat e NATOS hynë në Kosovë, në misionin paqeruajtës që do të quhej KFOR, duke i dhënë fund luftës gati dyvjeçare midis popullsisë kryengritëse shqiptare të organizuar në radhët e Ushtrisë Çlirimtare të Kosovës dhe forcave okupuese ushtarake dhe policore serbo-malazeze.
Ushtarët e parë të NATO-s që hynë në Kosovë më 12 qershor, ishin forcat speciale të Norvegjisë dhe ato të Shërbimit Special Ajror Britanik, duke u gjetur ballë për ballë me trupat e Rusisë, të cilët, një ditë më parë “befasisht” kishin marrë Aeroportin e Prishtinës me qëllimin e ndarjes së Kosovës.
Hyrja e ushtarëve të NATO-s hapi rrugën e kthimit në shtëpitë, tokën dhe vendin e tyre mbi një milionë shqiptarëve të Kosovës, të degdisur refugjatë në dhjetëra vende dhe tri-katër kontinente të botës.
Fotografitë e ditë së shënuar të 12 qershorit 1999 ruajnë emocionet e mëdha të qytetarëve të Kosovës, në ditën e çlirimit të vendit.
(Fotografitë: Profili i Kenneth Andresen)
VAZHDO TË LEXOSH MË TEPËR PËR TEMËN
”Partia kërkon Kosovën… që të vuajë si popull i Shkodrës”
”Është gjithmonë në modë… dashuria për Atdheun!”
‘Kosova, pengesa më e madhe për Serbinë në rrugën drejt BE-së’
