Në përpjekjet titanike të intelektualëve dhe atdhetarëve shqiptarë mërguar – 139 vjet më parë, pikërisht më 20 korrik të vitit 1883, pa dritën e botimit “Fiamuri i Arbërit”, revistë e përmuajshme në Koriliano-Kalabro, nga 1883 deri më 20 gusht 1885 dhe në Kozencë, nga 20 shtator 1885 deri më 15 nëntor 1887.
Në këtë të përkohshme, u pasqyruan probleme mbi të kaluarën historike të popullit shqiptar, mbi luftën për autonomi kombëtare, mbi përpjekjet e atdhetarëve në lidhje me zgjimin e ndërgjegjes kombëtare.
“Fiamuri i Arbrit” ka rëndësi jo vetëm se ka hyrë në historinë e shtypit shqiptar, si e përmuajshmja e parë letraro-politike, por sepse shprehu pikëpamjet politike të rilindasve.
E përmuajshme e De Radës, megjithë censurën, arriti të shtrihej tej Italisë, në Shqipëri, në Ballkan deri edhe në Amerikë.
Tri të përkohshmet e De Radës: “L’Albanese d’Italia” (l848), “La Bandiera Dell’Albania”(l883) dhe “Arbri i Rii” (l887) përbëjnë themelet e fletorarizmit arbëresh.
