Presidenti Ilir Meta ka takuar kryeministrin Albin Kurti gjatë vizitës së tij zyrtare në Kosovë. Kreu i Shtetit ka publikuar në rrjete sociale disa foto nga takimi me kreun e qeverisë kosovare.
Meta shkruan në Facebook se është i rëndësishëm koordinimi mes dy shteteve me qëllim anëtarësimin në BE.
Ndërsa për bashkëpunimin rajonal, Presidenti shqiptar thotë se ajo duhet të bëhet vetëm përmes nismave gjithëpërfshirëse si Procesi i Berlinit.
Postimi i Ilir Metës:
Shumë e përzemërt pritja nga Kryeministri i Kosovës, Albin Kurti, me të cilin pata kënaqësinë të zhvilloja një bisedë tepër të frytshme. Duke vlerësuar marrëdhëniet vëllazërore mes vendeve tona dhe potencialin e jashtëzakonshëm për forcimin e tyre, theksova rëndësinë e konkretizimit efikas të marrëveshjeve ndërqeveritare të nënshkruara.
Jetik realizimi i projekteve të përbashkëta që afrojnë edhe më shumë qytetarët tanë, si ndërtimi i hekurudhës Durrës-Prishtinë, me impakt në ekonominë e të dy vendeve dhe të rajonit, që do na bashkojnë më shumë dhe do ndalnin hemoragjinë demografike që na ka prekur.
Nevojitet më shumë koordinim edhe në politikën e jashtme dhe rajonale, në përputhje me qëllimin e përbashkët për anëtarësim në Bashkimin Europian. Lidhur me bashkëpunimin rajonal, ndamë të njëjtin vlerësim në përkrahje vetëm të nismave gjithëpërfshirëse, sikurse Procesi i Berlinit.
Kosova është bërë shembull i demokracisë, luftës kundër krimit e korrupsionit, sundimit të ligjit dhe europianizimit në rajon, e vlerësuar edhe nga raportet ndërkombëtare, që meriton sa më parë liberalizimin e vizave për qytetarët e saj.
VAZHDO TË LEXOSH MË TEPËR PËR TEMËN
Presidenti Meta në konferencë me Osmanin
