Katër punonjës të Bashkisë së Pogradecit janë arrestuar nga policia, pasi akuzohen se kanë vjedhur katër pako të ndihmave, që ishin dhuruar për qytetarët.
Policia njofton se rasti është iniciuar, pas një video të publikuar mbrëmë në rrjetet sociale, në të cilën shfaqeshin punonjës të bashkisë që vidhnin pako me ndihma të dhuruara nga donatorë të huaj për komunitetin e Pogradecit.
Në pranga janë vendosur shtetasit R.F. 58 vjeç, R.M. 58 vjeç, B.Xh. 35 vjeç dhe M.M. 35 vjeç.
Këta shtetas në bashkëpunim me njëri-tjetrin, në ambientet e pallatit të sportit, në qytetin e Pogradecit, vodhën pakot me ndihma.
Në cilësinë e provës materiale u sekuestruan pakot me sendet e vjedhura dhe një automjet tip “Audi”, me të cilin do të transportoheshin.
Njoftimi i policisë së Korçës:
Finalizohet operacioni policor i koduar “Pakoja e fundit”, për goditjen e veprimtarisë kriminale të vjedhjes. Vodhën duke shpërdoruar detyrën, pako me ndihma të dhuruara për qytetarët, vihen në pranga 4 punonjës të bashkisë Pogradec, bashkëpunëtorë në këtë veprimtari kriminale.
Sekuestrohen pakot e vjedhura dhe automjeti me të cilin do të transportoheshin.
Nisur nga një video e publikuar mbrëmjen e djeshme në rrjetet sociale, në të cilën shfaqeshin punonjës të bashkisë Pogradec që vidhnin pako me ndihma të dhuruara nga donatorë të huaj për komunitetin e Pogradecit, menjëherë specialistët për Hetimin e Krimit në Komisariatin e Policisë Pogradec filluan veprimet për verifikimin e rastit dhe për identifikimin e personave përgjegjës. Nga provat e grumbulluara dhe nga hetimet e mëtejshme të kryera, u bë i mundur dokumentimi i plotë i kësaj ngjarjeje. Si rezultat, u arrestuan në flagrancë shtetasit:
– R. F., 58 vjeç, banues në fshatin Çërravë, Pogradec;
– R. M., 58 vjeç, banues në Pogradec;
– B. Xh., 35 vjeç, banues në Hudënisht, Pogradec;
– M. M., 35 vjeç, banues në fshatin Çervenakë, Pogradec.
Këta shtetas, me detyrë punonjës pranë bashkisë Pogradec, në bashkëpunim me njëri-tjetrin, në ambientet e pallatit të sportit, në qytetin e Pogradecit, vodhën disa pako me ndihma, të dhuruara nga donatorë të huaj, për komunitetin e kësaj bashkie. Në cilësinë e provës materiale u sekuestruan pakot me sendet e vjedhura dhe një automjet tip “Audi”, me të cilin do të transportoheshin.
Materialet i kaluan Prokurorisë pranë Gjykatës së Rrethit Gjyqësor Pogradec, për veprën penale “Vjedhja e kryer duke shpërdoruar detyrën”, kryer në bashkëpunim.
