Çdo javë, Partia Demokratike po dërgon në SPAK dosje “korrupsioni”. A thua se ka gjetur shtegun e duhur për të rrëzuar Edi Ramën ? Asnjë prej tyre nuk ka besueshmërinë e shqiptarëve, derisa opozita e sotme (ish-pushtetmbajtsja e djeshme) të çlirohet prej akuzave që janë ngritur dhe ngrihen drejt saj nga organet e drejtësisë. Gërdeci akuzon, akuzon dhe 21 Janari, akuzon rruga Elbasan-Tiranë e inaguruar me shpejtësi rrufe në pragun e zgjedhjeve, akuzon rruga e Kombit e lënë pas dore, akuzon rruga Levan –Tepelenë, akuzojnë dhjetra e dhjetra investime e projekte të lëna përgjysëm, por edhe akuza të tjera përvetësimesh ndaj pronave të shtetit dhe ish-pronareve.Pra,derisa Partia Demokratike dhe drejtuesit e saj aktualë, mbeten të damkosur, si mund të besojnë shqiptarët Sali Berishën dhe shpurën e tij, për “dosje të nxehta korruptive”?
Asnjë shqiptar nuk beson më tek kjo opozitë e sajuar, tek kjo opozitë e rikthyer në “xhaketat e vjetra”, e cila ç’nuk po shpik për të destabilizuar vendin, dhe krijuar terrenin e duhur për trazira. Beteja me dosjet e “korrupsionit” mbetet humbja e rradhës e kësaj opozite të “rinovuar”. Sali Berisha edhe dje doli para mediave, dhe akuzoi, cilësoi, dhe premtoi se “do ta rrëzojmë Edi Ramën nga pushteti”. Ai e quan “regjim” qeverisjen e ligjshme të Partisë Socialiste, quan edhe Edi Ramën “diktator”, njeriun që po prezanton vendin me dinjitet në Europë, SHBA dhe kudo, njeriun që mundësoi me punë dhe arritje hapjen e negociatave me BE. Beteja e “dosjeve” është humbja më e madhe e kësaj opozite, e cila me në krye Sali Berishën, do të marrë fillimisht në zgjedhjet e ardhshme lokale dhe pastaj në ato të përgjithshme, humbjen më të paimagjinueshme.
Dosjet e Sali Berishës, Tabakut dhe ndonjë tjetri që ushqehet me “lugën e zbrazur” të ardhjes në pushtet përmes opozitarizmit fallc, sfumohen pa vajtur mirë në shkallët e SPAK-ut. Mashtrimet dhe gënjeshtrat me “vjedhje 430 milion euro” apo dhe akuzat e stisura ndaj kryeministrit, natyrisht e kanë burimin tek ambicja banale për të ardhur në pushtet, jo për “xhepat e qytetareve” por për thasët e atyre që sa kishin pushtetin, bënë trafikun, kontrabandën, korrupsionin, dhe zhvatje të padëgjuara nga paratë e taksapaguesve shqiptarë. Dosjet e Berishës, janë shashka tymuese, që veçse i rrisin aksionet Edi Ramës dhe kësaj qeverie.
Prej Shtatorit të kaluar, Berisha “non-grata”, gjendet nën efektin e ankthit dhe frikës së ndëshkimit ligjor, por së fundi edhe elektoral. Shkatërrimi i Partisë Demokratike, dhe pronësimi mbi opozitën, e kanë kthyer atë forcë politike 30 vite pas. E vetmja rrugë që i ka mbetur ish-liderit “historik” për të sulmuar qeverinë dhe kryeministrin Rama, mbetet “beteja me dosjet e korrupsionit”. I rikthyer në “zanatin” e tij të vjetër, Berisha duket sikur luan mirë me dosjet, por ka harruar se Edi Rama nuk është “liliput”, që trembet kollaj nga shkresa të zhubrosura kasafortash.
VAZHDO TË LEXOSH MË TEPËR PËR TEMËN
Basha po luan përsëri me PD
A thua të jenë vërtetë “2 mijë” emra?
A thua të fitojë LSI, 3-4 mandate?
