Kryeministri Edi Rama do të mbledhë ditën e shtunë qeverinë.
Është një traditë kjo e kryeministrit Rama, që gjithmonë pasi kthehet nga pushimet, mbledh kabinetin qeveritar në ato që quhen ritrite.
Në këto ritrite, bëhet një analizë e të gjitha objektivave që janë vendosur dhe që janë përmbushur nga ministrat në përgjatë 365 ditëve të vitit.
Vizion Plus mëson se takimi edhe këtë vit, ashtu si një vit më parë do të zhvillohet në një restorant në Dajt.
Përpara Ramës, ministrat do të flasin për punën e tyre, se sa i kanë përmbushur objektivat dhe se çfarë synohet të bëhet për përmirësim të situatës në ministritë përkatëse.
Kreu i qeverisë do të zhvillojë një analizë të punës së bërë nga ministrat e tij, tashmë që thuajse bën një vit që kanë hyrë në mandatin e tretë qeverisës.
Kjo mbledhje vjen pas përfundimit të pushimeve verore nga kryeministri Rama. Për herë të fundit, Rama i mblodhi ministrat një ditë para zhvillimit të Kongresit të Partisë Socialiste që u mbajt më 10 prill në Pallatin e Kongreseve.
Pritet të shihet se si do shkojë takimi dhe nëse do të ketë apo jo detaje nga vetë kryeministri apo ministrat e tij.
