Nga selia e OKB-së, Kryeministri Edi Rama siguroi se Shqipëria nuk do të ndalet së luftuari për pastërtinë e Luftës Çlirimtare të Kosovës dhe rishikimin e Rezolutës së Këshillit të Europës në mbështetje të raportit famëkeq të tregimtarit Dick Marty.
Gjatë fjalës së tij në Asamblenë Përgjithshme të OKBsë, Rama sulmoi raportin e Dick Martyt për akuzat e ngritura ndaj UÇK-së për trafikim organesh. Sipas tij, asnjë aktakuzë e ngritur nuk është provuar dhe theksoi se Këshilli i Evropës duhet ta rishkruaj të vërtetën.
“Në vitin 2011, Asambleja Parlamentare e Këshillit të Europës miratoi një raport, përpiluar nga një parlamentar i zellshëm, i cili mban emrin Dick Marty, e ku akuzohej ushtria e Kosovës për krimin e neveritshëm të trafikimit të organeve. Z. Marty duhej të ishte paguar si tregimtar, por kurrë të besohej si raportues i Këshillit të Europës. Raporti i tij ishte tronditës, asokohe, i besuan, por u shndërrua në faktorin kyç të ushqimit të idesë dhe ngritjes së dhomave të specializuara të gjykatës për Kosovës. Po kështu, u bë një prej rasteve më të këqija të realitetit të shtrembëruar, lloji i manifestit për propagandën mbarëbotërore kundër pavarësisë së Kosovës.
Çdo përpjekje hetimore u bë gjatë këtyre 11 viteve të gjata për t’i vërtetuar këto akuza në nivel kombëtar, rajonal e ndërkombëtarisht, por më kot, asgjë, asnjë grimë prove a treguesi nuk u gjet askund në Kosovë apo kund tjetër që kishte të bënte me trafikimin e dyshuar e të pretenduar të organeve. E megjithatë, dhomat e specializuara për Kosovën, që u ngritën bazuar në këtë raport, ndërkohë që flasim, kanë arrestuar pa padi Presidentin e Kosovës Hashim Thaçin. Ai priti një vit në burgim derisa u akuzua zyrtarisht”, deklaroi Edi Rama.
Kryeministri mbrojti ish-Presidentin Hashim Thaçi, teksa kritikoi se ai u mor nga zyra dhe u mbajt një vit në burg pa asnjë aktakuzë apo padi. “Përpiquni ta imagjinoni të gjithë për një moment, Presidenti apo Kryeministri juaj, udhëheqësi i vendit tuaj që merret nga zyra, çohet në një vend të tretë, mbahet i ndaluar për një vit të tërë pa asnjë akt-akuzë zyrtare nga një organizëm i krijuar dhe sponsorizuar nga një komunitet vendesh demokratike e pa gjejeni?
As edhe një fjalë e vetme e gjithë akt-akuzës që vijoi nuk ka të bëjë me raportin e KE-së për krimin e pretenduar të trafikimit të organeve”, u shpreh Rama. Kryeministri kërkoi nga Kombet e Bashkuara që të pranojnë kërkesën e Shqipërisë për të pasur një tjetër raport dhe për të mos akuzuar pa prova ishluftëtarët e UÇK-së, të cilët janë prapa hekurave dhe po gjykohen në Hagë.
“Një fantazi e tërë. Ky është një dështim monumental në nivel ndërkombëtar dhe nuk ka të bëjë me një person, nuk ka të bëjë me procedurat e gjykatës, ka të bëjë me njollosjen e papërshtatshme të një vendi dhe historisë së tij. Demokracia e institucionit të saj, mes shumë virtyteve, kanë edhe atë të korrigjimit të fajeve dhe gabimeve të tyre, ne shpresojmë që saktësisht, Asambleja e KE-së do të nderojë të vërtetën dhe do pranojë kërkesën e Shqipërisë për të pasur një raport vijues, ndërkohë që dëmi është bërë dhe të ndihmojë të rivendosë besueshmërinë e një organizate kaq të rëndësishme ndërkombëtare. Ne kurrë nuk do të heqim dorë nga kjo e vërtetë dhe kurrë nuk do ndalim së nderuari ata që dhanë jetën për pavarësinë e tyre dhe për të cilët askush, në emër të askujt, nuk mund të hedhë as edhe një grimë balte”, deklaroi z. Rama.
VAZHDO TË LEXOSH MË TEPËR PËR TEMËN
Gjykata Speciale çoi vendin në zgjedhje
Konfirmimi i aktakuzave/ Rama e Meta i shprehin mbështetjen Thaçit
