Dy muaj pasi Boris Johnson njoftoi me ngurrim dorëheqjen e tij në shkallët e 10 Downing Street, Britania më në fund ka zgjedhur një udhëheqëse të re: Liz Truss.
“Është nder të zgjidhem si kryetar i Partisë Konservatore dhe Unioniste. Do të doja të falënderoja Komitetin e 1922, kryetarin e partisë së Partisë Konservatore, për organizimin e një prej intervistave më të gjata të punës në histori”, tha Truss me shaka, pas shpalljes së rezultateve. “Do të doja të falënderoja gjithashtu familjen time, miqtë e mi, kolegët e mi politikë dhe të gjithë ata që ndihmuan në këtë fushatë. Unë jam jashtëzakonisht mirënjohëse për të gjithë mbështetjen tuaj.”
Fitorja e Truss-it ndaj rivalit të saj drejtues, ish-kancelarit Rishi Sunak, ishte konsideruar gjerësisht si një rezultat i paramenduar në Westminster.
Ajo ishte favoritja në mesin e anëtarëve të Partisë Konservatore (e dyta pas shefit të saj të dikurshëm). Pavarësisht përpjekjeve të udhëheqëses së tretë femër të Mbretërisë së Bashkuar për të promovuar veten si rimishërimi ideologjik i së parës, Margaret Thatcher, Truss-i shihet si kandidatja ”e vazhdimësisë’ së Johnson. Pasi ajo të emërohet zyrtarisht Kryeministre nga Mbretëresha më 6 shtator, “detyra e parë” do të jetë të zgjidhë krizat e shumta që la pas paraardhësi i saj.
Kush është Liz Truss?
E njohur si një kameleon politik, Truss ka mbajtur disa poste të rëndësishme gjatë jetës së saj. E lindur në Oksford në një familje të krahut të majtë, fëmijëria e Truss-it shpesh përfshihej në demonstrata për çarmatimin bërthamor dhe kundër qeverisë konservatore të Thatcher-it, e cila çoi në reforma gjithëpërfshirëse ekonomike të përqendruara rreth tregjeve të lira, privatizimit dhe një shteti të vogël.
Si studente në Universitetin e Oksfordit, ajo drejtoi shoqërinë studentore të Liberal Demokratëve të qendrës dhe kërkonte heqjen e monarkisë. Më vonë ajo u bë një besnike e etur e Partisë Konservatore – një tranzicion që ajo ia atribuoi rritjes.
Lajmet se Truss kishte një lidhje në fillim të viteve 2000 me një ligjvënës konservator 10 vjet më të madh nga ajo, kërcënuan t’i rrezikonin qëllimet. Por ajo u zgjodh deputete në vitin 2010 dhe u ngjit në radhët e konservatorëve. Në vitin 2014, Truss u bë ministrja më e re femër e kabinetit në vend si sekretare e mjedisit në qeverinë e David Cameron dhe shërbeu në kabinetet e Theresa May dhe Johnson.
Gjatë referendumit të Brexit të vitit 2016, vetëm gjashtë vjet në mandatin e saj si ligjvënëse konservatore, Truss mbështeti idenë që Mbretëria e Bashkuar të qëndronte në BE, duke e quajtur Brexit një “tragjedi të trefishtë” të mbrojtur nga ata që “jetojnë në tokën e qyqeve me re”.
Gjashtë vjet më vonë, Truss është një breksitiste dhe një bartëse e flamurit të krahut të djathtë euroskeptik të vendit. Ajo e përshkruan veten si “të pamëshirshme”, gjë që mund të ndihmojë në shpjegimin e rritjes së saj të shpejtë në radhët e konservatorëve.
Ajo shihet gjithashtu si jashtëzakonisht besnike, pasi ka qenë një nga ministrat e paktë që nuk dha dorëheqjen gjatë rënies së kryeministrisë së Johnson-it. Për kritikët e saj, megjithatë, ajo është një oportuniste politike – dikush që mund të arrijë shpejt dhe plotësisht në çfarëdo pozicioni që i përshtatet asaj.
Burimi: Revista Time
Përktheu dhe përshtati: Konica.al
VAZHDO TË LEXOSH MË TEPËR PËR TEMËN
Gratë së shpejti në pushtet në Britaninë e Madhe
